فیصل آباد۔ 17 مارچ (اے پی پی):محکمہ زراعت شعبہ پیسٹ وارننگ اینڈ کوالٹی کنٹرول آف پیسٹی سائیڈزنے ضلع فیصل آباد میں پیسٹی سائیڈ ڈیلرز کے لائسنسوں کے اجرا اور تجدید کیلئے 42ویں ٹریننگ شیڈول کااعلان کردیاہے جس کیلئے درخواستیں یکم اپریل سے 13اپریل تک وصول کی جائیں گی جبکہ ٹریننگ کا آغاز15 اپریل سے ہوگا۔اسسٹنٹ ڈائریکٹرزراعت پیسٹ وارننگ اینڈ کوالٹی کنٹرول آف پیسٹی سائیڈزچوہدری اسراررشیدکے مطابق نئے درخواست گزار ٹریننگ فیس سات ہزاردوسو ساٹھ روپے تجدید اورفیلڈ اسسٹنٹ ڈپلومہ ہولڈر تین ہزارچھ سوتیس روپے جمع کرائیں۔
انہوں نے بتایا کہ درخواستیں دفتر اسسٹنٹ ڈائریکٹر پیسٹ وارننگ اینڈ کوالٹی کنٹرول آف پیسٹی سائیڈز،پلانٹ پتھالوجیکل ریسرچ انسٹی ٹیوٹ،ایوب زرعی تحقیقاتی ادارہ،فیصل آباد کے دفتر میں 13 اپریل تک پہنچ جانی چاہئیں ،نامکمل اور مقررہ تاریخ کے بعد درخواست وصول نہیں کی جائے گی۔ انہوں نے بتایا کہ نئے لائسنس کے اجرا کیلئے درخواست گزارسادہ کاغذپر درخواست لکھ کر اس کے ساتھ میٹرک سند چار عدد،شناختی کارڈ اور ڈومیسائل دوعدد،پاسپورٹ سائز فوٹوپانچ عددتمام کاغذات کی کاپیاں تصدیق شدہ منسلک کریں گے جبکہ تجدیدکیلئے ڈیلرز پرانے لائسنس کی دوعددتصدیق شدہ فوٹوکاپیاں بھی ساتھ لگائیں۔
