لاہور۔27جون (اے پی پی):نامور لوک گلوکار حامد علی بیلا کی 23ویں برسی جمعرات کو منائی گئی۔انہیں اپنے مداحوں سے بچھڑے 23برس بیت گئے، ان کی میٹھی آواز کا جادوبرسوں بعد آج بھی عوام کے کانوں میں رس گھولتا ہے ، درویش صفت گلوکار حامد علی بیلا کچھ اس طرح ڈوب کر کافیاں، غزلیں اور گیت گاتے کہ سننے والوں پر سحر طاری ہو جاتا، مادھو لال حسین کے کلام کی بدولت حامد علی بیلا نے بطور لوک گلوکار بے حد مقبولیت حاصل کی ،
پٹیالہ گھرانے کی آواز سب سے پہلے ریڈیو پاکستان سے گونجی اور پھر شاہ حسین، غلام فرید، محمد بخش کی کافیاں گاتے گاتے یہ فقیر منش فنکار فن اور شہرت کی بلندیوں کو چھوتا گیا۔حامد علی بیلا نے شاہ حسین کی لکھی ایک کافی گائی جو آج بھی ان کی پہچان ہے، گلوکار نے مسحور کن لوک اور صوفیانہ گائیکی کی بدولت پرائیڈ آف پرفارمنس سمیت کئی ایوارڈ ز حاصل کئے ، لوک گلوکار حامد علی بیلا27جون 2001 کو اپنے خالق حقیقی سے جا ملے ۔
Short Link: https://urdu.app.com.pk/urdu/?p=479333
