لاہور۔25اگست (اے پی پی):معروف رومانوی شاعر احمد فراز کی 16ویں برسی اتوار کو منائی گئی۔ انہیں مداحوں سے بچھڑے 16 سال گزر گئے،احمد فراز کا اصل نام سید احمد شاہ تھا، وہ14جنوری 1931 کو کوہاٹ میں پیدا ہوئے، شاعری انہیں ورثے میں ملی۔ احمد فراز نے تین زبانوں اردو، فارسی اور انگریزی میں ایم اے کیا۔1960 کی دہائی میں وہ زیر تعلیم ہی تھے کہ جب ان کی شاعری کا پہلا مجموعہ” تنہا تنہا” شائع ہوا، احمد فراز نے اپنے لفظوں سے شاعری کو نئی جہتوں سے روشناس کرایا۔
متعددنامور گلوکاروں نے احمد فراز کی شاعری کو چار چاند لگائے۔ مہدی حسن اور میڈم نور جہاں نے احمد فراز کی غزلیں گا کر خوب شہرت پائی، چھ دہائیوں پرمحیط ادبی زندگی پر احمد فراز کو کئی اعزازات سے نوازا گیا جن میں ہلال امتیاز، ستارہ امتیاز، ہلال پاکستان اور نگار ایوارڈز شامل ہیں۔ انکے شعری مجموعوں میں تنہا تنہا، جاناں جاناں، خواب گل پریشاں ہے، درد آشوب، نابینا شہر میں آئینہ، بے آواز گلی کوچوں میں، شب خون، میرے خواب ریزہ ریزہ اور اے عشق جفا پیشہ شامل ہیں۔رومانوی شاعر احمد فراز25اگست 2008 کو اپنے خالق حقیقی سے جا ملے ۔
Short Link: https://urdu.app.com.pk/urdu/?p=497254
