فیصل آباد۔ 19 مئی (اے پی پی):کماد کے کاشتکاروں کو جڑی بوٹیوں کی تلفی کےلئے فوری گوڈی کی ہدایت کی گئی ہے ۔نظامت زرعی اطلاعات محکمہ زراعت کے ترجمان نے کہاکہ کاشتکار ستمبر کاشتہ کماد کی فصل کومئی کے رواں ہفتہ کے دوران نائٹروجن کھاد کی دوسری قسط ڈال دیں اور اس کے بعد مناسب آبپاشی بھی کریں۔
انہوں نے کہاکہ کاشتکار مونڈھی فصل کی باقی ماندہ نائٹروجنی کھاد کی پہلی قسط ڈالنے کے بعد پودوں پر مٹی چڑھادیں تاکہ بارش، تیز ہواؤں یاآندھی کے باعث فصل کو گرنے سے بچایاجاسکے۔
انہوں نے کہاکہ کماد کی جڑ اور تنے گڑوؤں کے تدارک کے لئے کاشتکار ماہرین زراعت کی مشاورت یا محکمہ زراعت کے عملہ کی رہنمائی حاصل کرتے ہوئے مناسب دانہ دار زہریں ڈال سکتے ہیں۔انہوں نے بتایاکہ زہریں ڈالنے کے بعد کھیت کو پانی لگانے کے بھی مثبت نتائج حاصل ہو سکتے ہیں۔
Short Link: https://urdu.app.com.pk/urdu/?p=598679
