بیونسے جیسیل دنیا کی پانچویں ارب پتی موسیقار بن گئیں ،فوربز رپورٹ

لاس اینجلس ۔31دسمبر (اے پی پی):امریکی گلوکارہ اور اداکارہ بیونسے جیسیل نے بلیئرینز کلب میں قدم رکھ لیا ہے۔فوربز کے مطابق بیونسے اب دنیا کی پانچویں موسیقار ہیں جو ارب پتی بن چکی ہیں۔ وہ اس نایاب فہرست کا حصہ بن گئیں جس میں پہلے ہی ان کے شوہر جے-زی، ریحانا، بروس اسپرنگسٹن اور ٹیلر سوئفٹ شامل ہیں۔یہ سنگ میل ایک شاندار پرفارمنس سیریز کے بعد حاصل ہوا ہے۔ بیونسے کے کاؤ بوائے کارٹر ٹور نے ٹکٹوں کی فروخت سے 400 ملین ڈالر سے زیادہ کی آمدنی حاصل کی جبکہ ملبوسات سے اضافی 50 ملین ڈالر کمایا گیا۔

اس سے پہلے، ان کے رینیسانس ورلڈ ٹور نے 579 ملین ڈالر سے زائد کی کمائی کی، جس نے ان کی حیثیت کو ایک ایسے فنکار کے طور پر مستحکم کر دیا جو دنیا بھر میں سب سے زیادہ منافع کمانے والے زندہ پرفارمرز میں شامل ہے۔بیونسے کی کامیابی میں اہم کردار ان کے اپنے کام کی ملکیت کا ہے، جو انہوں نے 2010 میں پارک ووڈ انٹرٹینمنٹ کے قیام سے حاصل کیا۔ یہ کمپنی ان کے میوزک، فلمیں، کنسرٹس اور ڈاکیومنٹریز بناتی ہے ۔

ان کی حالیہ بڑی آمدن میں 2024 کے این ایف ایل کرسمس ہاف ٹائم شو کے لیے تقریباً 50 ملین ڈالر اور لیوی کی مہمات میں شرکت کے لیے 10 ملین ڈالر شامل ہیں۔فوربز کے مطابق، 2025 میں دنیا بھر میں 3,000 سے زیادہ ارب پتی موجود ہیں۔