سمیڈا کے عالمی سرٹیفیکیشن پروگرام میں ایس ایم ایز کی دلچسپی

لاہور۔3فروری (اے پی پی):سمال اینڈ میڈیم انٹرپرائزز ڈویلپمنٹ اتھارٹی (سمیڈا) کی جانب سے شروع کیا گیا ایس ایم ای سرٹیفیکیشن اینڈ انٹرنیشنل ایکریڈیٹیشن گرانٹ پروگرام اہم بین الاقوامی سرٹیفیکیشن حاصل کر کے کاروباری اداروں کو عالمی سطح پر مسابقتی بننے میں مدد فراہم کرنے لگا ہے،جس میں کاروباری افراد کی دلچسپی آئے روز بڑھنے لگی ہے۔یہ منصوبہ پنجاب انفارمیشن ٹیکنالوجی بورڈ(پی آئی ٹی بی) کے تعاون سے شروع کیا جا رہا ہے جس کا مقصد پاکستان بھر کے ایس ایم ایزکو بین الاقوامی سرٹیفیکیشن حاصل کرنے اور بہتر برآمدی صلاحیت اور مارکیٹ کے روابط کے ساتھ زیادہ مسابقتی بننے کیلئے مماثل گرانٹس کی پیشکش کرنا ہے۔

چھوٹے اور درمیانے درجے کے کاروباروں کو عالمی سطح پر مسابقتی بننے میں مدد کرنے کیلئے حکومت کی کوششوں کے حوصلہ افزا نتائج سامنے آنے لگے ہیں،کیونکہ کاروباری افراد ایس ایم ایزسرٹیفیکیشن اور انٹرنیشنل ایکریڈیٹیشن گرانٹ پروگرام کے لیے مثبت رد عمل دے رہے ہیں،پراجیکٹ کی نگرانی کرنے والے حکام کے مطابق سمیڈا کو پہلے ہی ملک کے کئی حصوں سے ایس ایم ایزکی75 درخواستیں موصول ہو چکی ہیں اور ان میں سے26 کو ایک کمیٹی نے جانچ پڑتال کے بعد منظور کر لیا ہے۔حکام کا کہنا ہے کہ تقریبا 41 کیسز پر غور اور جائزہ لیا جا رہا ہے۔حکام کا کہنا ہے کہ سمیڈا کا ارادہ ہے کہ حکومت کی کوششوں کے حصے کے طور پر رواں مالی سال میں ملک بھر سے100ایس ایم ایز کو سرٹیفیکیشن کیلئے گرانٹ کی پیشکش کی جائے تاکہ کاروباری افراد کو ساکھ کمانے،عالمی سطح پر مسابقت کرنے اور ترقی کو تیز کرنے میں مدد مل سکے۔

متعلقہ حکام کا مزید کہنا ہے اس پروگرام کو انتہائی شفاف طریقے سے لاگو کیا جا رہا ہے،درخواستوں پر سختی سے پہلے آیئے پہلے پایئے کی بنیاد پر کارروائی کی جاتی ہے۔ان کا کہنا ہے کہ اہل ایس ایم ایز کو سہولت فراہم کرنے کیلئے پوری کارروائی احتیاط سے کی جا رہی ہے۔عہدیداروں نے مزید کہا کہ اس ضمن میں خواتین تاجروں اور اسٹارٹ اپس کی خاص طور پر حوصلہ افزائی کی جاتی ہے کہ وہ ایک آسان اور شفاف عمل کے ذریعے سرٹیفیکیشن گرانٹس کیلئے درخواست دے سکیں۔

ان کا مزید کہنا ہے کہ یہ منصوبہ مالی اور تکنیکی رکاوٹوں کو دور کر کے چھوٹے اور درمیانے درجے کے کاروباری اداروں کی مدد کے لیے حکومت کے مخلصانہ عزم کی عکاسی کرتا ہے۔مماثل گرانٹس اور ماہرانہ رہنمائی کے ذریعے ایس ایم ایزکو برآمدات کے لیے درکار عالمی معیار،حفاظت اور تعمیل کے معیارات پر پورا اترنے میں مدد کی جا رہی ہے۔سمیڈا حکام کا کہنا ہے کہ مذکورہ سرٹیفیکیشن نہ صرف کاروباری اداروں کو غیر ملکی منڈیوں تک رسائی میں مدد دیتی ہے بلکہ اندرونی نظام کو مضبوط کرتی ہے، دستاویزات کو بہتر بناتا ہے اور بینکوں اور خریداروں کے ساتھ اعتماد کو بڑھاتا ہے۔

انہوں نے مزید کہا کہ ایک بار جب ایس ایم ایزکی تصدیق ہو جاتی ہے،تو وہ فنانس تک رسائی،سپلائی چین میں شامل ہونے اور آپریشنز کو بڑھانے کے لیے بہتر پوزیشن میں آ جاتے ہیں۔پروگرام میں شرکت کے خواہشمند ایس ایم ایز کو سمیڈا کی ویب سائٹ یا ر ایس ایم ای جسٹر یشن پورٹل https.smerp.smeda.org کے ذریعے درخواست دینے کی ترغیب دی جاتی ہے۔ حکام کا کہنا ہے کہ رجسٹریشن مفت اور آسان ہے اور سمیڈا اس سلسلے میں آگاہی سیشنز اور ڈیجیٹل طریقوں سے کاروباری افراد تک پہنچنے کی کوشش کر رہا ہے۔