وزیراعظم کے ریلیف پیکج سے کاروباری برادری کے اعتماد میں اضافہ ہوا ہے، صدر اسلام آباد چیمبر آف کامرس اینڈ انڈسٹری سردار طاہر محمود

اسلام آباد۔3فروری (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) نے صنعتوں اور برآمد کنندگان کے لیے جامع ریلیف پیکج کے اجراء پر وزیر اعظم محمد شہباز شریف کی بھرپور تعریف کی ہے اور اسے معاشی سرگرمیوں کی بحالی، سرمایہ کاروں کا اعتماد بحال کرنے اور پاکستان کی برآمدات کی بنیاد کو مضبوط بنانے کی جانب ایک مثبت قدم قرار دیا ہے۔آئی سی سی آئی کے صدر سردار طاہر محمود نے ان خیالات کا اظہار ایک پریس کانفرنس سے خطاب کرتے ہوئے کیا۔انہوں نے چیئرمین فیڈرل بورڈ آف ریونیو (ایف بی آر) کی جانب سے اسلام آباد کی غیر منقولہ جائیداد کی ویلیوایشن ٹیبل پر نظرثانی کرنے پر بھی تعریف کی۔

انہوں نے کہا کہ اس ریشنلائزیشن سے مارکیٹ کا اعتماد بحال کرنے اور رئیل سٹیٹ سیکٹر میں حقیقی سرمایہ کاری کی حوصلہ افزائی میں مدد ملے گی۔آئی سی سی آئی کے صدر نے کہا کہ بجلی کے نرخوں میں 4.04 روپے فی یونٹ کمی، صنعتی وہیلنگ چارجز نو روپے سے کم، ایکسپورٹ ری فنانس اسکیم (ERS) کی شرح میں 7.5 فیصد سے 4.5 فیصد تک کمی، اور دو سال کے لیے معروف برآمد کنندگان کو نیلے پاسپورٹ کا اجراء قابل تعریف اقدامات ہیں۔انہوں نے ان اقدامات کو تجارت، سرمایہ کاری اور برآمدات کے فروغ کے لیے وزیر اعظم کے عزم کی واضح عکاسی قرار دیا اور حکومت کے معاشی وژن کے لیے آئی سی سی آئی کی مکمل حمایت کا اعادہ کیا۔

انہوں نے اقتصادی استحکام اور قومی خوشحالی کو یقینی بنانے کے لیے حکومت اور نجی شعبے کے درمیان پل کا کردار ادا کرنے کے لیے چیمبر کے عزم کا اعادہ کیا۔انہوں نے حکومت پر زور دیا کہ ان عوامل کو فوری بنیادوں پر معقول بنائے ۔ آئی سی سی آئی کے صدر نے مزید زور دیا کہ KIBOR کو سنگل ہندسوں پر لانا کاروبار کرنے کی لاگت کو کم کرنے اور طویل مدتی سرمایہ کاری کی حوصلہ افزائی کے لیے ضروری ہے۔انہوں نے رئیل اسٹیٹ سیکٹر کو ایک صنعت قرار دینے کے پرزور مطالبہ کا اعادہ کیا۔

انہوں نے شعبہ جاتی چیلنجوں کی نشاندہی کرنے اور موثر پالیسی سازی میں سہولت فراہم کرنے کے لیے تمام اہم اسٹیک ہولڈرز کی شرکت کے ساتھ ایک نیشنل ریئل اسٹیٹ کانفرنس کے انعقاد کی تجویز بھی دی۔اس موقع پر خطاب کرتے ہوئے آئی سی سی آئی کے فاؤنڈر گروپ کے چیئرمین شیخ طارق صادق نے وزیراعظم کے ریلیف پیکج کا خیرمقدم کیا لیکن صنعتی مسابقت کو بڑھانے اور اقتصادی ترقی کو برقرار رکھنے کے لیے مزید اقدامات کی ضرورت پر زور دیا۔

اس موقع پر سینئر نائب صدر طاہر ایوب، نائب صدر عرفان چوہدری، سابق صدور زبیر احمد ملک، محمد اعجاز عباسی، ایگزیکٹو ممبران اسحاق سیال، ذوالقرنین عباسی، ثناء اللہ خان، محترمہ فاطمہ عظیم، ملک محسن خالد، عمران منہاس، راجہ نوید ستی اور تاجر برادری کی بڑی تعداد بھی موجود تھی۔