لاہور۔15فروری (اے پی پی):کوآرڈینیٹر برائے فیڈرل ٹیکس محتسب سیف الرحمان نے کہا ہے کہ اچھی تربیت یافتہ افرادی قوت پائیدار معاشی ترقی کا بنیادی ستون ہے۔ لاہور میں تاجروں کے ایک وفد سے گفتگو کرتے ہوئے انہوں نے کہا کہ جب کارکن بین الاقوامی سطح پر تسلیم شدہ مہارتیں اور پیشہ ورانہ سرٹیفکیٹس حاصل کرتے ہیں تو وہ مقامی اور عالمی دونوں لیبر مارکیٹس میں زیادہ مسابقتی بن جاتے ہیں۔ …
اچھی تربیت یافتہ افرادی قوت پائیدار معاشی ترقی کا بنیادی ستون ہے، سیف الرحمان
لاہور۔15فروری (اے پی پی):کوآرڈینیٹر برائے فیڈرل ٹیکس محتسب سیف الرحمان نے کہا ہے کہ اچھی تربیت یافتہ افرادی قوت پائیدار معاشی ترقی کا بنیادی ستون ہے۔ لاہور میں تاجروں کے ایک وفد سے گفتگو کرتے ہوئے انہوں نے کہا کہ جب کارکن بین الاقوامی سطح پر تسلیم شدہ مہارتیں اور پیشہ ورانہ سرٹیفکیٹس حاصل کرتے ہیں تو وہ مقامی اور عالمی دونوں لیبر مارکیٹس میں زیادہ مسابقتی بن جاتے ہیں۔
اس سے نہ صرف بہتر ملازمتوں کے مواقع پیدا ہوتے ہیں بلکہ زیادہ تنخواہیں، بہتر کام کے حالات اور طویل مدتی کیریئر استحکام بھی ممکن ہوتا ہے۔ انہوں نے کہا کہ ہنرمند افرادی قوت زیادہ پراعتماد، جدت پسند اور ٹیکنالوجی کی ترقی کے مطابق خود کو ڈھالنے کی صلاحیت رکھتی ہے، جس سے مجموعی پیداواریت میں نمایاں اضافہ ہوتا ہے۔
سیف الرحمان نے مزید کہا کہ اہل اور تربیت یافتہ کارکنان آپریشنل تاخیر اور نااہلی کو نمایاں حد تک کم کرتے ہیں، منصوبے بروقت مکمل، معیار برقرار اور غلطیوں سے بچا ئوممکن ہوتا ہے۔ انہوں نے کہا کہ جب بیرونِ ملک شراکت دار اور سرمایہ کار پاکستان میں تربیت و سرٹیفکیشن کا منظم نظام دیکھتے ہیں تو ان کا اعتماد بڑھتا ہے۔
یہی اعتماد مضبوط تجارتی تعلقات، براہِ راست غیر ملکی سرمایہ کاری کے فروغ اور پاکستان کی ایک قابلِ اعتماد معاشی شراکت دار کے طور پر ساکھ کو بہتر بنانے کا باعث بنتا ہے۔ انہوں نے کہا کہ انسانی سرمائے میں سرمایہ کاری محض سماجی ضرورت نہیں بلکہ قومی ترقی اور عالمی معاشی نظام میں موثر شمولیت کے لیے ایک ناگزیر حکمتِ عملی ہے۔
