اسٹیٹ بینک آف پاکستان کے تعاون سے قرضہ اسکیموں کے بارے آگاہی سیشن 24 فروری کو (سیماپ)میں ہوگا

سیالکوٹ۔ 17 فروری (اے پی پی):اسٹیٹ بینک آف پاکستان کے تعاون سے قرضہ اسکیموں کے بارے میں ایک ایس ایم ای آگاہی سیشن 24 فروری کو مرالہ روڈ سیالکوٹ میں سرجیکل انسٹرومینٹس مینوفیکچررز ایسوسی ایشن آف پاکستان (سیماپ) میں منعقد ہوگا۔ ترجمان سیماپ کے مطابق اس سیشن کا مقصد ایس ایم ای مالکان، کاروباری افراد کو تجارتی بینکوں کی طرف سے پیش کردہ مختلف فنانسنگ پروڈکٹس کے بارے میں آگاہ کرنا ہے تاکہ کاروبار کی ترقی اور پائیداری میں مدد مل سکے۔

شرکاء کو ورکنگ کیپیٹل لونز، ٹرم لونز، ٹریڈ فنانس اور مالی وسائل تک آسان رسائی کی سہولت فراہم کرنے کے لیے بنائے گئے ایس ایم ای کریڈٹ سکیموں کے بارے میں تفصیلی معلومات حاصل ہوں گی۔ماہرین اہلیت کے معیار، درخواست کے طریقہ کار، اور کاروباری فنانسنگ کو محفوظ بنانے کے لیے بہترین طریقوں کے بارے میں بھی شرکاء کی رہنمائی کریں گے۔ ترجمان سیماپ کے مطابق سیشن صبح 11:00 بجے سے دوپہر 1:00 بجے تک ہوگا۔