چیف منیجر اسٹیٹ بینک آف پاکستان کاپاکستان گارمنٹس مینوفیکچررز اینڈ ایکسپورٹرز ایسوسی ایشن دورہ، الفا اسلامک سیونگ اکاؤنٹ پر بریفنگ

سیالکوٹ۔ 21 فروری (اے پی پی):اسٹیٹ بینک آف پاکستان سیالکوٹ کے چیف منیجر مسٹر وقاص کاشف باجوہ نے اپنی ٹیم اور بینک الفلاح اسلامک بینکنگ کے نمائندگان کے ہمراہ پاکستان گارمنٹس مینوفیکچررز اینڈ ایکسپورٹرز ایسوسی ایشن کا دورہ کیا۔دورے کے دوران وفد نے الفا اسلامک سیونگ اکاؤنٹ کے فوائد پر تفصیلی بریفنگ دی۔ انہوں نے بتایا کہ یہ اکاؤنٹ سود سے پاک منافع کی فراہمی، کسی بھی وقت محفوظ اور قابلِ اعتماد لین دین کی سہولت اور کم از کم بیلنس کی شرط نہ ہونے جیسی نمایاں خصوصیات کا حامل ہے۔

اس موقع پر بینک الفلاح اسلامک بینکنگ کی جانب سے پیش کردہ شریعت کے مطابق کاروباری اسکیموں پر بھی روشنی ڈالی گئی، جن کی منظوری ان کے شریعہ بورڈ سے حاصل ہے۔ یہ اسکیمیں چھوٹے و درمیانے درجے کے کاروباری اداروں، نئے کاروباری افراد اور خواتین کی ملکیت میں چلنے والے کاروباروں کی ضروریات کو مدنظر رکھتے ہوئے تیار کی گئی ہیں، تاکہ انہیں موزوں مالیاتی سہولیات فراہم کی جا سکیں۔دورے کا مقصد سیالکوٹ کے کاروباری حلقوں میں اسلامی بینکاری کی مصنوعات اور خدمات کو فروغ دینا اور مقامی صنعت و تجارت کی معاونت کے عزم کو اجاگر کرنا تھا۔