قومی سلامتی کو یقینی بنانے کیلئے سائبر سکیورٹی کی ضرورت ہے، سائبر خطرات سے تحفظ کاروباری استحکام کے لئے ناگزیر ہے، سردار طاہر محمود

اسلام آباد۔11مارچ (اے پی پی):اسلام آباد چیمبر آف کامرس اینڈ انڈسٹری کے صدر سردار طاہر محمود نے کہا ہے کہ سائبر سکیورٹی پاکستان کی ڈیجیٹل معیشت، کاروباری آپریشنز کے تحفظ اور ایک دوسرے سے جڑی ہوئی دنیا میں قومی سلامتی کو یقینی بنانے کے لیے ایک اہم ضرورت بن چکی ہے۔بدھ کو یہاں سائبر سکیور پاکستان کے حوالہ سے منعقدہ کانفرنس سے خطاب کرتے ہوئے انہوں نے زور دیا کہ ڈیجیٹل پلیٹ فارمز، ای کامرس، ڈیجیٹل بینکنگ اور فن ٹیک سروسز کی تیز رفتار ترقی نے معاشی ترقی کے وسیع مواقع پیدا کئے ہیں تاہم ڈیجیٹل ماحولیاتی نظام کی توسیع نے سائبر خطرات، ڈیٹا کی خلاف ورزیوں، مالی فراڈ اور سائبر جاسوسی میں بھی اضافہ کیا ہے۔

انہوں نے کہا کہ ڈیجیٹل انفراسٹرکچر اور ڈیٹا کے تحفظ کو یقینی بنانا ڈیجیٹل سسٹم میں اعتماد پیدا کرنے اور پاکستان کے ٹیکنالوجی کے شعبہ میں سرمایہ کاری کی حوصلہ افزائی کے لیے ضروری ہے۔ انہوں نے واضح کیا کہ ملک کو ایک جامع سائبر سکیورٹی فریم ورک کی ضرورت ہے جس میں مستحکم پالیسیاں، جدید سائبر ڈیفنس ٹیکنالوجیز اور کاروباری اداروں اور شہریوں میں زیادہ سے زیادہ آگاہی شامل ہو۔سردار طاہر محمود نے کہا کہ کاروباری برادری مالیاتی لین دین، سپلائی چین مینجمنٹ اور صارفین کی شمولیت کے لیے ڈیجیٹل پلیٹ فارمز پر بہت زیادہ انحصار کرتی ہے جو تجارتی سرگرمیوں کے تحفظ اور سرمایہ کاروں کے اعتماد کو برقرار رکھنے کے لیے سائبر سکیورٹی کو اہم بناتی ہے۔

انہوں نے خصوصی تعلیم اور تربیتی پروگراموں کے ذریعے ہنر مند سائبر سکیورٹی پروفیشنلز کو تیار کرنے کی اہمیت کو بھی اجاگر کیا تاکہ پاکستان اپنے ڈیجیٹل انفراسٹرکچر کو موثر طریقے سے محفوظ کر سکے اور عالمی سائبر سکیورٹی انڈسٹری میں مواقع سے فائدہ اٹھا سکے۔انہوں نے اس بات کا اعادہ کیا کہ اسلام آباد چیمبر آف کامرس اینڈ انڈسٹری کاروباروں بالخصوص چھوٹے اور درمیانے درجے کے اداروں میں سائبر آگاہی کو فروغ دینے کے لیے حکومت، ٹیکنالوجی کے اداروں اور نجی شعبہ کے ساتھ مل کر کام کرنے کے لیے پرعزم ہے۔انہوں نے نتیجہ اخذ کیا کہ پاکستان میں ڈیجیٹل تجارت، اختراعات اور پائیدار اقتصادی ترقی کے لیے ایک محفوظ ماحول پیدا کرنے کے لیے سائبر سکیورٹی کا استحکام از حد ضروری ہے۔