پراپرٹی ٹیکس نہ بڑھانے کے سی ڈی اے کے فیصلے کو سراہتے ہیں، چیمبر صدر

اسلام آباد۔14اپریل (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) کے صدر سردار طاہر محمود نے کیپٹل ڈویلپمنٹ اتھارٹی (سی ڈی اے) بورڈ کی جانب سے وفاقی دارالحکومت میں پراپرٹی ٹیکس میں اضافہ نہ کرنے کے حوالے سے کئے گئے فیصلے کو سراہا ہے۔منگل کو جاری ایک بیان میں آئی سی سی آئی کے صدر نے اس فیصلے کو انتہائی قابل تعریف اور بروقت قرار دیتے ہوئے کہا کہ یہ ایک عملی اور ترقی پر مبنی نقطہ نظر کی عکاسی کرتا ہے۔ انہوں نے اس بات پر زور دیا کہ موجودہ ٹیکس دہندگان پر اضافی ٹیکس کا بوجھ ڈالنا کاروباری سرگرمیوں میں رکاوٹ بن سکتا ہے جبکہ ٹیکس نیٹ کو وسعت دینا ایک زیادہ پائیدار اور منصفانہ حکمت عملی ہے۔

سردار طاہر محمود نے نئے تعینات ہونے والے چیئرمین سی ڈی اے سہیل اشرف کا پرتپاک خیرمقدم کرتے ہوئے اس اعتماد کا اظہار کیا کہ وہ اسلام آباد کی مختلف مارکیٹوں اور صنعتی زونز کے تاجروں کو درپیش دیرینہ مسائل کے حل کو ترجیح دیں گے۔کاروبار دوست ماحول کی اہمیت کو اجاگر کرتے ہوئے انہوں نے کہا کہ کاروباری برادری کی ترقی اور خوشحالی کا براہ راست تعلق بہتر انفراسٹرکچر اور معاون پالیسیوں سے ہے۔ انہوں نے مزید کہا کہ جب کاروبار پروان چڑھتے ہیں، تو یہ بالآخر قومی اقتصادی ترقی اور استحکام میں حصہ ڈالتے ہیں۔آئی سی سی آئی کے صدر نے اسلام آباد کو ایک متحرک اور مسابقتی کاروباری مرکز میں تبدیل کرنے کے لئے سی ڈی اے کے ساتھ مل کر کام کرنے کے لئے تاجر برادری کے عزم کا اعادہ کیا۔

انہوں نے زور دیا کہ سرکاری اداروں اور نجی اسٹیک ہولڈرز کے درمیان بامعنی تعاون دارالحکومت کی حقیقی اقتصادی صلاحیت کو پروان چڑھانے کے لیے ضروری ہے۔انہوں نے یہ بھی اعلان کیا کہ چیمبر جلد ہی چیئرمین سی ڈی اے سہیل اشرف کو کاروباری رہنماؤں کے ساتھ ایک انٹرایکٹو سیشن کے لئے مدعو کرے گا۔ اس ملاقات کا مقصد رابطہ کاری کو مضبوط کرنا، باہمی افہام و تفہیم کو فروغ دینا اور تعمیری بات چیت کے ذریعے مسائل کے بروقت حل کو یقینی بنانا ہو گا۔