حنا الطاف کا خواتین سے اجتماعی مزاحمت کی اپیل، کام کی جگہ ہراسانی پر تشویش کا اظہار

اسلام آباد۔18مئی (اے پی پی):اداکارہ حنا الطاف نے کام کی جگہ ممکنہ ہراسانی کے ایک واقعے کے بعد خواتین کو متحد ہو کر آواز بلند کرنے اور اجتماعی طور پر مزاحمت کرنے کی اپیل کی ہے۔انسٹاگرام پر جاری ایک بیان میں حنا الطاف نے کہا کہ وہ حال ہی میں کام کے دوران ایک ایسے شخص سے سامنا کر چکی ہیں جس کے رویے نے انہیں غیر محفوظ محسوس کروایا، تاہم وہ بروقت صورتحال کو سمجھ کر وہاں سے نکلنے میں کامیاب رہیں۔اداکارہ کے مطابق انہوں نے فوری طور پر پروڈکشن ٹیم کو اس واقعے سے آگاہ کیا، تاہم ان کا کہنا تھا کہ ایک کام کرنے والی عورت کو اس طرح کے حالات کا سامنا کرنا “دل توڑ دینے والا” ہے۔انہوں نے کہا کہ پاکستان میں خواتین کے لیے ہر وقت محتاط رہنا ایک تھکا دینے والا عمل بن چکا ہے، اور اکثر اوقات “سمجھداری” ہی ان کے لیے بنیادی تحفظ کا ذریعہ بن جاتی ہے۔انہوں نے زور دیا کہ خواتین کو اپنی اندرونی آواز پر بھروسہ کرنا چاہیے، ضرورت پڑنے پر فوری ردعمل دینا چاہیے اور کسی بھی زیادتی پر جوابدہی کا مطالبہ کرنا چاہیے۔ ان کے مطابق خواتین کو اپنے حقوق کے لیے خاموش رہنے کے بجائے اجتماعی طور پر آواز اٹھانی چاہیے۔اداکارہ نے کہا کہ جب تک نظام میں تبدیلی نہیں آتی، خواتین کو ایک دوسرے کے ساتھ کھڑے ہو کر جدوجہد جاری رکھنی ہوگی۔