سیالکوٹ،محکمہ زراعت کی کپاس کی فصل کی بہتر دیکھ بھال کیلئے سفارشات جاری

سیالکوٹ۔18مئی (اے پی پی):محکمہ زراعت نے کپاس کی فصل کی بہتر دیکھ بھال کیلئے سفارشات جاری کردی ہیں ۔ ترجمان محکمہ زراعت سیالکوٹ نے کہا ہے کہ کاشتکار کپاس کی موسمی کاشت جاری رکھیں اور محکمہ زراعت پنجاب کی سفارش کردہ بی ٹی اور نان بی ٹی اقسام کاشت کریں۔ کپاس کے کاشتکار موسمی صورتحال اور زمین کی قسم کو مدِ نظر رکھتے ہوئے 7 تا10 دن بعد آبپاشی کریں۔

ترجمان نے مزید کہا کہ کپاس کے ابتدائی مراحل میں جڑی بوٹیاں 10 تا42 فیصد تک نقصان کا باعث بنتی ہیں۔لہذٰا جب تمام جڑی بوٹیاں اُگ آئیں تو فصل کے اُگاؤ کے بعد ترجیحاً25 تا30 دن کے درمیان گلایفوسیٹ بحساب 1500 تا1800 ملی لیٹر 100 لیٹر پانی میں ملا کر سپرے کریں۔ٹرپل جین اقسام پر بغیر شیلڈ گلایفوسیٹ سپرے کی جا سکتی ہے تاہم اگر فصل 60 تا70 دن کی فصل کرنا مقصود ہو تو یہ سپرے محکمہ زراعت کے مقامی ماہرین کے مشورہ سے ٹی جیٹ نوزل سے شیلڈ لگا کر کریں۔