معاشی بحالی اور زرمبادلہ میں اضافے کے لیے برآمدات کو قومی ترجیح قرار دیا جائے، پی سی ایم ای اے

اسلام آباد۔31مئی (اے پی پی):پاکستان کارپٹ مینوفیکچررز اینڈ ایکسپورٹرز ایسوسی ایشن نے کہا ہے کہ ملکی معیشت کی بحالی، زرمبادلہ کے ذخائر میں اضافے اور روزگار کے مواقع پیدا کرنے کے لیے برآمدات کو ترجیح بنایا جائے۔

ایسوسی ایشن کے چیئرمین میاں عتیق الرحمٰن اور وائس چیئرمین ریاض احمد کا کہنا ہے کہ برآمد کنندگان بڑھتی پیداواری لاگت، ٹیکسوں اور عالمی مسابقت کے باعث مشکلات کا شکار ہیں، برآمدی صنعتوں کے لیے بجلی و توانائی کے نرخ کم کیے جائیں، ریفنڈز کی بروقت ادائیگی یقینی بنائی جائے اور برآمدی شعبے کے لیے مراعاتی سکیموں کا اعلان کیا جائے۔

ایسوسی ایشن کے رہنمائوں نے کہا کہ برآمد کنندگان کی اکثریت نے رواں سال اکتوبر میں پاکستان میں شیڈول عالمی نمائش کے تناظر میں برآمدی سودے ہونے کے پیش نظر بڑے پیمانے پر قالینوں کی تیاری کرا رکھی ہے ، اعلیٰ حکام سے اپیل ہے کہ عالمی نمائش کی تیاریوں کے لئے فنڈز جاری کئے جائیں تاکہ عالمی خریداروں سے موثر رابطوں کا آغاز کیا جا سکے۔