بارشوں کے دوران کپاس کی فصل کے تحفظ وبہتر نگہداشت سے متعلق ایڈوائزری جاری

لاہور۔16جولائی (اے پی پی):محکمہ زراعت پنجاب نے بارشوں کے دوران کپاس کی فصل کے تحفظ وبہتر نگہداشت سے متعلق ایڈوائزری جاری کر دی۔ ایڈوائزری میں کہا گیا ہے کہ کاشتکار بارشوں کے دوران کپاس کی فصل کی دیکھ بھال کے لیے خصوصی انتظامات کریں۔

معمول کی بارش کپاس کی فصل کے لیے مناسب ہوتی ہیں۔ اس سے فصل کی بڑھوتری اور پھول گڈی پر اچھے اثرات مرتب ہوتے ہیں لیکن معمول سے زیادہ بارشیں جس سے کپاس کے کھیت پانی سے بھر جائیں فصل کے لیے انتہائی نقصان دہ ہیں۔ اگر بارشیں زیادہ ہوں تو کاشتکار کھیت کے کناروں کے ساتھ ایک گہری نالی بنا دیں تا کہ بارش کا وافر پانی اس نالی کے ذریعے کھیت سے باہر نکل سکے۔ بعد ازاں، اس پانی کو بڑے کھال میں ڈال کر دھان یا کماد کے کھیت کو لگائیں۔ اگر کھیت سے پانی نکالنا ممکن نہ ہو تو کھیت کے دونوں کناروں پر گہرے گڑھے کھود لیں تاکہ کھیت سے بارش کے وافر پانی کو ان گڑھوں میں جمع کیا جا سکے۔ بارش ہونے کے 2 یا 3 دن بعد محکمہ زراعت پنجاب کے مقامی زرعی ماہرین کے مشورہ سے کپاس کے کھیت میں 20 فیصد یوریا کا محلول بنا کر سپرے کریں۔