وفاقی وزیر تجارت سے برطانوی ہائی کمشنر کی ملاقات، دوطرفہ تجارتی روابط تیز کرنے پر اتفاق

اسلام آباد۔23جولائی (اے پی پی):پاکستان اور برطانیہ نے دوطرفہ تجارتی روابط تیز کرنے، بزنس ٹو بزنس تعاون کو مضبوط بنانے اور موجودہ تجارتی ڈائیلاگ کو مزید منظم اقتصادی اور تجارتی فریم ورک میں اپ گریڈ کرنے پر اتفاق کیا ہے۔ جمعرات کو وزارت سے جاری بیان کے مطابق یہ مفاہمت وفاقی وزیر تجارت جام کمال خان اور برطانوی ہائی کمشنر جین میریٹ کے درمیان وزارت تجارت میں ملاقات کے دوران طے پائی۔ اس موقع پر جام کمال خان نے کہا کہ پاکستان مسابقت کو بہتر بنانے اور کاروبار میں سہولت فراہم کرنے کے لیے ٹیرف ریشنلائزیشن، ڈیجیٹلائزیشن اور ریگولیٹری اصلاحات کو آگے بڑھا رہا ہے۔

انہوں نے کہا کہ متوقع ٹیرف و مالیات تک بہتر رسائی سے ایس ایم ایز، ای کامرس وینچرز اور ایکسپورٹ پر مبنی کاروباری اداروں کو نئی منڈیوں میں توسیع میں مدد ملے گی۔وفاقی وزیر نے افریقا اور وسطی ایشیا کو پاکستانی برآمدات کے لیے امید افزا مقامات کے طور پر اجاگر کیا اور معیارات، سرٹیفیکیشن، ٹریس ایبلٹی، ماحولیاتی تعمیل اور ویلیو ایڈیشن میں زیادہ تعاون پر زور دیا۔ جین میریٹ نے پاکستان کی اقتصادی اصلاحات کو سراہتے ہوئے کہا کہ برطانیہ تجارتی مکالمے کو ایک مضبوط ادارہ جاتی میکانزم میں تبدیل کرنے کے امکانات کا جائزہ لے رہا ہے جس میں واضح طور پر بیان کردہ شعبوں، ورکنگ گروپس اور عمل درآمد کی ٹائم لائنز ہیں۔

سیکرٹری کامرس نے کہا کہ پاکستان-برطانیہ کے دو ورکنگ گروپ پہلے ہی کام کر رہے ہیں جبکہ تعاون کو وسیع کرنے کے لیے اضافی گروپوں کی تجویز دی گئی ہے۔انہوں نے کاروبار کو آسان بنانے، سرمایہ کاری کو فروغ دینے اور تجارتی طور پر قابل عمل منصوبوں کی تخلیق میں یوکے-پاکستان بزنس کونسل کے مضبوط کردار پر زور دیا۔دونوں فریقوں نے اس سال موسم خزاں میں اسلام آباد میں آئندہ پاکستان-برطانیہ تجارتی مذاکرات کے انعقاد کے لیے قریبی رابطہ کاری اور کام کرنے پر بھی اتفاق کیا۔