چرچ آف پاکستان کی جانب سے حافظ محمد طاہر محمود اشرفی کو ’’گلوبل پیس ایوارڈ‘‘ سے نوازا گیا

لاہور۔18ستمبر (اے پی پی):چرچ آف پاکستان نے پاکستان علماء کونسل کے چیئرمین اور قومی پیغامِ امن کمیٹی کے کوآرڈینیٹر حافظ محمد طاہر محمود اشرفی کو امن، بین المذاہب ہم آہنگی اور مذہبی رواداری کے فروغ کے لئے ان کی خدمات کے اعتراف میں ’’گلوبل پیس ایوارڈ‘‘ پیش کیا۔چرچ آف پاکستان کے صدر بشپ آزاد مارشل نے لاہور میں منعقدہ ایک پروقار تقریب میں حافظ محمد طاہر محمود اشرفی کو یہ اعزاز پیش کیا اور ملک بھر میں امن، مذہبی ہم آہنگی اور مکالمے کے فروغ کے لئے ان کی طویل عرصے سے جاری کوششوں کو سراہا۔

بشپ آزاد مارشل نے کہا کہ حافظ محمد طاہر محمود اشرفی نے پاکستان میں رہنے والے غیر مسلم شہریوں کے حقوق کے تحفظ اور مختلف مذاہب کے پیروکاروں کے درمیان مکالمے اور ہم آہنگی کے فروغ کے لئے مسلسل جدوجہد کی ہے۔انہوں نے کہا کہ بین المذاہب ہم آہنگی اور امن کے فروغ کے لئے حافظ محمد طاہر محمود اشرفی کا قومی اور بین الاقوامی کردار قابلِ ستائش ہے اور پاکستان سمیت دنیا بھر میں امن کے خواہاں افراد کے لئے ان کی خدمات قابلِ قدر ہیں۔ایوارڈ وصول کرتے ہوئے حافظ محمد طاہر محمود اشرفی نے چرچ آف پاکستان اور بشپ آزاد مارشل کا شکریہ ادا کیا اور کہا کہ بشپ آزاد مارشل کی قیادت میں چرچ آف پاکستان مختلف مذاہب اور مسلم مکاتبِ فکر کی قیادت کے ساتھ مل کر امن، قومی سلامتی اور پاکستان کے استحکام کے فروغ میں اہم کردار ادا کر رہا ہے۔

حافظ محمد طاہر محمود اشرفی نے کہا کہ قومی پیغامِ امن کمیٹی کے پلیٹ فارم سے مسلم اور غیر مسلم مذہبی قیادت کی مشترکہ جدوجہد پاکستان میں امن، بین المذاہب و بین المسالک ہم آہنگی اور قومی وحدت کو مزید مضبوط کرے گی۔چرچ آف پاکستان کی جانب سے گلوبل پیس ایوارڈ دینے پر شکریہ ادا کرتے ہوئے حافظ محمد طاہر محمود اشرفی نے امن، مکالمے، مذہبی ہم آہنگی اور تمام پاکستانیوں کے جائز حقوق کے تحفظ کے لئے اپنی جدوجہد جاری رکھنے کے عزم کا اعادہ کیا۔