ازبک میڈیا وفد کا آرمی میوزیم، شوٹنگ گیلری اور واہگہ بارڈر کا دورہ،پاکستان کے شاندار عسکری، تاریخی ورثے اور جدید شوٹنگ سہولیات کا جائزہ لیا

لاہور۔21ستمبر (اے پی پی):نو رکنی ازبک میڈیا وفد نے پیر کے روز لاہور میں آرمی میوزیم اور لاہور گیریژن شوٹنگ گیلری کا دورہ کیا اور پاکستان کے شاندار عسکری ورثے، تاریخی ورثے اور جدید شوٹنگ سہولیات کا جائزہ لیا۔آرمی میوزیم لاہور کے ڈائریکٹر بریگیڈیئر (ر) عمر خالد نے وفد کا استقبال کیا اور انہیں میوزیم کی تاریخی اہمیت اور مختلف حصوں کے بارے میں بریفنگ دی۔وفد کو میوزیم میں موجود خطے کی تاریخ کے مختلف ادوار اور ثقافتی ورثے کی عکاسی کرنے والے نوادرات اور مجموعے کے بارے میں آگاہ کیا گیا۔ازبک میڈیا نمائندگان نے مختلف تاریخی ادوار سے متعلق اشیا، بالخصوص فوجی سازوسامان، ہتھیاروں اور 1965 اور 1971 کی جنگوں سے متعلق جنگی یادگاروں میں خصوصی دلچسپی لی۔ انہیں ان اشیا کی تاریخی اہمیت اور جنگوں کے دوران پاکستان کے دفاع میں ان کے کردار کے بارے میں بتایا گیا۔میوزیم میں قبل از تاریخ، گندھارا، اسلامی، سکھ اور ہندو بدھ ادوار سے متعلق نوادرات اور نمائشیں بھی موجود ہیں جو خطے کے قدیم اور متنوع ثقافتی ورثے کی عکاسی کرتی ہیں۔

ازبک میڈیا وفد نے پاکستان کے تاریخی اور ثقافتی ورثے کو محفوظ کرنے اور اسے نمایاں کرنے کی کاوشوں کو سراہا۔ انہوں نے پاکستان آرمی کے قومی دفاع اور خدمت کے کردار کو اجاگر کرنے والی مختلف نمائشوں کے ذریعے پیش کی گئی پیشہ ورانہ مہارت، نظم و ضبط اور عسکری ورثے کی بھی تعریف کی۔دورے کے اختتام پر بریگیڈیئر عمر خالد نے وفد کو خیرسگالی اور نیک خواہشات کے اظہار کے طور پر یادگاری سووینئر پیش کیا۔بعد ازاں وفد نے لاہور گیریژن شوٹنگ گیلری کا دورہ کیا، جہاں شوٹنگ گیلری کے سیکرٹری کرنل شاہد ترمذی اور اسسٹنٹ سیکرٹری میجر احمد برکی نے وفد کا استقبال کیا اور انہیں شوٹنگ ایرینا اور اس کی سہولیات کے بارے میں بریفنگ دی۔ازبک وفد کے ارکان نے درمیانے اور طویل فاصلے پر شوٹنگ کا تجربہ کیا اورتیر اندازی میں بھی حصہ لیا۔ انہوں نے شوٹنگ گیلری میں دستیاب سہولیات اور خدمات کو سراہتے ہوئے اپنے تجربے کو انتہائی مثبت قرار دیا۔بعد ازاں وفد نے واہگہ بارڈر کا دورہ کیا جہاں انہوں نے پریڈ اور روایتی پرچم اتارنے کی تقریب کا مشاہدہ کیا۔ وفد کے ارکان نے تقریب میں گہری دلچسپی کا اظہار کیا اور تاریخی سرحدی مقام پر نظم و ضبط کے مظاہرے اور پرجوش ماحول کو سراہا۔

ازبک میڈیا نمائندگان کے اس دورے سے انہیں پاکستان کے عسکری ورثے، تاریخی ورثے اور عصری دفاعی سہولیات کے بارے میں براہِ راست آگاہی حاصل کرنے کا موقع ملا۔ یہ دورہ پاکستان کی تاریخی، ثقافتی اور سیاحتی استعداد کو اجاگر کرنے کے سلسلے میں ان کے پروگرام کا حصہ تھا۔