شنگھائی تعاون تنظیم کے وفد کا این ڈی ایم اے ہیڈکوارٹرز کا دورہ، جدید ڈیزاسٹر مینجمنٹ سسٹم پر تفصیلی بریفنگ

اسلام آباد۔30ستمبر (اے پی پی):شنگھائی تعاون تنظیم (ایس سی او) کے رکن ممالک کے نمائندگان کے وفد نے نیشنل ڈیزاسٹر مینجمنٹ اتھارٹی (این ڈی ایم اے) کے ہیڈکوارٹرز کا دورہ کیا جہاں انہیں نیشنل ایمرجنسیز آپریشن سینٹر (این ای او سی) کے صلاحیتی دائرہ کار اور قدرتی آفات سے نمٹنے کے لئے قائم جدید ڈیجیٹل نظام پر تفصیلی بریفنگ دی گئی۔

چیئرمین این ڈی ایم اے لیفٹیننٹ جنرل انعام حیدر ملک نے ایس سی او وفد کا خیرمقدم کرتے ہوئے پاکستان کے فعال اور جدید ڈیزاسٹر مینجمنٹ فریم ورک سے آگاہ کیا۔

بریفنگ کے دوران وفد کو قدرتی آفات کی پیشگی اطلاع (ارلی وارننگ سسٹم)، ممکنہ خطرات کی نشاندہی، خطرات میں کمی کے لئے جدید ٹیکنالوجی، تحقیق اور ڈیٹا پر مبنی نظام کے موثر استعمال کے بارے میں بتایا گیا۔ اس کے علاوہ عوام تک ہنگامی صورتحال میں بروقت، مستند معلومات اور پیشگی الرٹس پہنچانے کے جدید طریقہ کار پر بھی روشنی ڈالی گئی۔

چیئرمین این ڈی ایم اے نے خطے کو موسمیاتی تبدیلیوں اور قدرتی خطرات کے اثرات سے محفوظ رکھنے کے لئے ایس سی او رکن ممالک کے درمیان مشترکہ حکمت عملی، پائیدار نظام اور مربوط اقدامات اپنانے کی تجویز پیش کی۔

انہوں نے رکن ممالک کے مابین معلومات کے بروقت تبادلے، باہمی استعداد کار میں اضافے اور تکنیکی اشتراکِ عمل کو وقت کی اہم ضرورت قرار دیا۔ایس سی او وفد نے قدرتی آفات سے نمٹنے کے لئے پاکستان میں این ڈی ایم اے کے جدید ترین نظام، پیشگی تیاریوں اور بالخصوص این ای او سی کے فعال صلاحیتی دائرہ کار کو سراہتے ہوئے اسے خطے کے لئے ایک بہترین نمونہ قرار دیا۔