صارفین کیلئے قیمتوں کے عمومی اشاریہ میں ستمبرکے دوران 10.3 فیصد اضافہ

اسلام آباد۔1اکتوبر (اے پی پی):پاکستان بیوروبرائے شماریات کی جانب سے جاری ماہانہ رپورٹ کے مطابق ستمبرمیں صارفین کیلئے قیمتوں کاعمومی اشاریہ 10.3فیصدریکارڈکیاگیاجو اگست میں 11.1 فیصد اور گزشتہ سال ستمبر میں 5.8 فیصد تھا۔ ماہانہ بنیاد پر ستمبر کے دوران عمومی مہنگائی میں 1.3 فیصداضافہ ہوا۔ ستمبر میں شہری علاقوں میں صارفین کے لئے قیمتوں کا عمومی اشاریہ 10.1 فیصد رہا جو اگست میں 10.4 فیصد اور گزشتہ سال ستمبر میں 5.7 فیصد تھا جبکہ دیہی علاقوں میں یہ شرح 10.5 فیصد ریکارڈ کی گئی جو اگست میں 12.2 فیصد اور گزشتہ سال ستمبر میں 5.9 فیصد تھی۔ستمبر میں قیمتوں کا حساس اشاریہ (ایس پی آئی) سالانہ بنیادوں پر 8.4 فیصد بڑھا جو اگست میں 9.5 فیصد اور گزشتہ سال ستمبر میں 4.5 فیصد تھا۔ اسی طرح ہول سیل پرائس انڈیکس میں ستمبر کے دوران 13.3 فیصد اضافہ ریکارڈ کیا گیا جو اگست میں 11.8 فیصد اور گزشتہ سال ستمبر میں 0.6 فیصد تھا۔

رپورٹ کے مطابق شہری علاقوں میں نان فوڈ نان انرجی مہنگائی ستمبر میں 8.6 فیصد رہی جو اگست میں 8.8 فیصد اور گزشتہ سال ستمبر میں 7 فیصد تھی۔ دیہی علاقوں میں نان فوڈ نان انرجی مہنگائی 8.1 فیصد ریکارڈ کی گئی جو اگست میں 8.5 فیصد اور گزشتہ سال ستمبر میں 7.8 فیصد تھی۔شہری علاقوں میں بنیادی افراط زر کی شرح ستمبر میں 9.4 فیصد رہی جو اگست میں 8.9 فیصد اور گزشتہ سال ستمبر میں 5.7 فیصد تھی، جبکہ دیہی علاقوں میں بنیادی مہنگائی بھی 9.4 فیصد ریکارڈ کی گئی جو اگست میں 9.1 فیصد اور گزشتہ سال ستمبر میں 6.5 فیصد تھی۔

ستمبر میں ٹماٹر کی قیمت میں ماہانہ بنیادوں پر 24.67 فیصد، چکن 8.14 فیصد، انڈے 5.92 فیصد، آلو 4.19 فیصد، دال مونگ 2.09 فیصد، تازہ سبزیاں 1.59 فیصد، لوبیا 1.11 فیصد، چینی 0.88 فیصد، تازہ پھل 0.32 فیصد اور شہد کی قیمت میں 0.03 فیصدکمی ریکارڈ کی گئی۔اسی طرح ٹرانسپورٹ سروسز کی قیمتوں میں 0.8 فیصد اور درسی کتب کی قیمتوں میں 0.60 فیصدکی کمی ہوئی۔

اس کے برعکس ستمبر میں پیاز کی قیمت میں ماہانہ بنیادوں پر 29.17 فیصد، گندم 3.66 فیصد، بیسن 2.74 فیصد، آٹا 2.28 فیصد، دال چنا 1.82 فیصد، گندم سے بنی مصنوعات 1.60 فیصد، دال مسور 1.56 فیصد، خشک میوہ جات 1.27 فیصد، سرسوں کا تیل 0.88 فیصد، گوشت 0.77 فیصد، بیکری مصنوعات 0.77 فیصد، تیار شدہ کھانے 0.74 فیصد اور کوکنگ آئل کی قیمت میں 0.55 فیصد اضافہ ریکارڈ کیا گیا۔رپورٹ کے مطابق ستمبر میں بجلی کی قیمتوں میں 15.28 فیصد، ایندھن 10.76 فیصد، موٹر فیول 5.37 فیصد، رہائشی خدمات 2.26 فیصد، ادویات 0.89 فیصد اور اونی کپڑوں کی قیمتوں میں 0.80 فیصد اضافہ ہوا۔