نائب وزیرِ اعظم اسحاق ڈار کی زیر صدارت آزاد جموں و کشمیرکے ترقیاتی ایجنڈے سے متعلق اجلاس، جاری ترقیاتی منصوبوں پرپیش رفت کا جائزہ

اسلام آباد۔3اکتوبر (اے پی پی):نائب وزیرِ اعظم/وزیرِ خارجہ سینیٹر محمد اسحاق ڈار نے آزاد جموں و کشمیر میں ترقیاتی منصوبوں کی بروقت تکمیل اور مالی وسائل کے موثر استعمال کی اہمیت پر زور دیا ہے تاکہ پاکستان اور آزاد جموں و کشمیر کے وزرائے اعظم کی ہدایات اور عوام کی خواہشات کے مطابق طویل المدتی ترقی کو سہارا دیا جا سکے اور عوامی فلاح و بہبود میں بہتری لائی جاسکے ۔

نائب وزیرِ اعظم کے دفتر سے جاری بیان کے مطابق یہ بات نائب وزیرِ اعظم/وزیرِ خارجہ سینیٹر محمد اسحاق ڈار نے آزاد جموں و کشمیر (اے جے کے) کے ترقیاتی ایجنڈے سے متعلق ایک اجلاس کی صدارت کرتے ہوئے کہی۔ اجلاس میں آزاد جموں و کشمیر میں جاری ترقیاتی منصوبوں، بشمول سڑکوں کی مرمت و تزئین نو، اور سماجی و اقتصادی اقدامات کی پیش رفت کا جائزہ لیا گیا۔

انتظامی ہم آہنگی کو مضبوط بنانے کے لیے اقدامات پر بھی تبادلہ خیال کیا گیا۔نائب وزیرِ اعظم/وزیرِ خارجہ نے ترقیاتی منصوبوں کی بروقت تکمیل اور مالی وسائل کے موثر استعمال کی اہمیت پر زور دیا تاکہ طویل المدتی ترقی کو سہارا دیا جا سکے اور عوامی فلاح و بہبود کو بہتر بنایا جا سکے، جو پاکستان اور آزاد جموں و کشمیر کے وزرائے اعظم کی ہدایات اور آزاد جموں و کشمیر کے عوام کی خواہشات کے مطابق ہو۔

اجلاس میں وزیرِ اعظم کے معاونِ خصوصی طارق باجوہ، سیکرٹریز خزانہ اور امورِ کشمیر، اسپیشل سیکرٹری خزانہ، چیف سیکرٹری آزاد جموں و کشمیر، ایڈیشنل چیف سیکرٹری (ترقیات) آزاد جموں و کشمیر اور پلاننگ اینڈ ڈویلپمنٹ ڈویژن کے جوائنٹ چیف اکانومسٹ نے شرکت کی۔