نیشنل گرڈ کمپنی آف پاکستان نے اپنے نئے لوگو ’’نیشنل گرڈ پاکستان‘‘ کا اجرا کر دیا

اسلام آباد۔14اکتوبر (اے پی پی):نیشنل گرڈ کمپنی آف پاکستان (این جی سی) نے اپنی نئی برانڈ شناخت (لوگو) ’’نیشنل گرڈ پاکستان‘‘ کا اجراء کر دیا ہے۔ ترجمان این جی سی کے مطابق نئی شناخت ادارے کے جدید وژن، ملک کے بدلتے ہوئے توانائی کے منظرنامے اور قومی ترسیلی نظام کو مزید مضبوط بنانے کے عزم کی عکاس ہے۔

انہوں نے کہا کہ نیشنل گرڈ پاکستان ملک کے ایکسٹرا ہائی وولٹیج ٹرانسمیشن سسٹم کی منصوبہ بندی، تعمیر، آپریشن اور دیکھ بھال کی ذمہ داریاں انجام دے رہا ہے اور ڈیجیٹلائزیشن، جدید SCADA سسٹم، ڈرونز کے ذریعے ٹرانسمیشن لائنوں کی انسپکشن اور سائبر سکیورٹی کے بہتر انتظامات کے ذریعے نظام کی کارکردگی اور قابل اعتماد ترسیل کو بہتر بنانے کے لیے کوشاں ہے۔ مالی سال 2027ء تا 2029ء کے بزنس پلان کے تحت نیشنل گرڈ پاکستان کی بجلی ترسیل کی گنجائش تقریباً 70,910 ایم وی اے سے بڑھا کر 96,905 ایم وی اے تک لے جانے کا منصوبہ ہے۔

اس منصوبے میں 765 کے وی، 500 کے وی اور 220 کے وی کے نئے انفراسٹرکچر، گرڈ سٹیشنز، جدید ٹرانسمیشن لائنوں اور ہائی وولٹیج ڈائریکٹ کرنٹ نظام کے انضمام جیسے اقدامات شامل ہیں۔ نیشنل گرڈ پاکستان کی نئی شناخت ادارےکے تجربے، جدید تقاضوں سے ہم آہنگ ہونے کے عزم اور مستقبل کی توانائی کی ضروریات کو پورا کرنے کی حکمت عملی کی نمائندگی کرتی ہے۔ ایک جدید، مستحکم اور قابل اعتماد قومی ترسیلی نظام پاکستان کی معاشی ترقی اور توانائی کے شعبے میں پائیدار پیش رفت کے لیے کلیدی اہمیت رکھتا ہے۔