چیئرمین سی ڈی اے کا سیکٹر ای-12 کا دورہ ،جاری ترقیاتی کاموں کی تازہ ترین پیشرفت کا جائزہ

اسلام آباد۔16اکتوبر (اے پی پی):چیئرمین کیپٹل ڈویلپمنٹ اتھارٹی (سی ڈی اے) سہیل اشرف نے سیکٹر ای-12 کا دورہ کیا، جہاں انہوں نے جاری ترقیاتی کاموں کی تازہ ترین پیشرفت کا جائزہ لیا اور متعلقہ افسران کو ترقیاتی سرگرمیوں میں تیزی لانے کی ہدایت کی۔ اس موقع پر ڈائریکٹر جنرل ورکس، سی ڈی اے، چیف ایگزیکٹو آفیسر، ایم سی آئی، ایڈیشنل ڈپٹی کمشنر (جنرل)، پراجیکٹ ڈائریکٹر اور متعلقہ اسسٹنٹ کمشنر بھی ان کے ہمراہ تھے۔

چیئرمین سی ڈی اے نے کہا کہ ادارہ اسلام آباد بھر میں ترقیاتی کاموں پر خصوصی توجہ دے رہا ہے جن میں سیکٹرز کی ترقی، سڑکوں کی تعمیر و بہتری، انڈر پاسز اور پیدل چلنے والوں کے پلوں کی تعمیر اور قیمتی سرکاری اراضی واگزار کرانا شامل ہے۔وفاقی وزیر داخلہ سید محسن رضا نقوی کی ہدایات اور چیئرمین سی ڈی اے سہیل اشرف کی مؤثر نگرانی میں یہ اقدامات اسلام آباد کو مزید ترقی یافتہ، جدید اور مثالی شہر بنانے کے مقصد کے تحت کئے جا رہے ہیں،شہری ترقی کو یقینی بنانے اور سرکاری اثاثوں کے تحفظ کے لئے سی ڈی اے نے سیکٹر ای-12 میں سرکاری اراضی واگزار کرانے کے حوالے سے نمایاں پیشرفت کی ہے، اربوں روپے مالیت کی ایک ہزار کنال سے زائد قیمتی سرکاری اراضی واگزار کرائی جا چکی ہے، یہ کامیابی سرکاری املاک کے تحفظ اور سیکٹر کی منصوبہ بند ترقی کو یقینی بنانے کی جانب ایک اہم سنگِ میل ہے، واگزار کرائی گئی اراضی مستقبل کے ترقیاتی منصوبوں کو آگے بڑھانے اور ضروری بنیادی ڈھانچے اور شہری سہولیات کی فراہمی میں معاون ثابت ہو رہی ہے۔

سی ڈی اے وفاقی دارالحکومت میں سیکٹر ڈویلپمنٹ کو تیز کرنے اور رہائشی سہولیات کو بہتر بنانے کی وسیع تر حکمتِ عملی کے تحت سیکٹرز آئی-12، ای-12 اور سی-14 میں ترقیاتی سرگرمیاں جاری رکھے ہوئے ہے،ان سیکٹرز میں ضروری بنیادی ڈھانچے کی ترقی، سڑکوں کے نیٹ ورک کی بہتری اور شہری سہولیات کی فراہمی پر خصوصی توجہ دی جا رہی ہے تاکہ رہائشیوں کو بہتر سہولیات فراہم کرنے کے ساتھ ساتھ ان سیکٹرز کی منظم ترقی کو بھی یقینی بنایا جا سکے۔سیکٹر آئی-12 میں منصوبہ بند ترقی اور بنیادی ڈھانچے کی بہتری پر کام جاری ہے تاکہ بڑھتی ہوئی رہائشی آبادی کی ضروریات پوری کی جا سکیں۔ اسی طرح سیکٹر ای-12 میں سرکاری اراضی کے تحفظ اور سیکٹر کی منصوبہ بند ترقی کو یقینی بنانے کے لیے اقدامات کے ساتھ ترقیاتی سرگرمیاں جاری ہیں۔ سیکٹر سی-14 میں بھی ترقیاتی کام جاری ہیں۔

سی ڈی اے اسلام آباد کے مختلف سیکٹرز میں ترقیاتی کاموں کو تیز کرنے اور شہریوں کو آمدورفت کی بہتر سہولیات اور معیاری شہری سہولیات فراہم کرنے کے لئے تمام دستیاب وسائل بروئے کار لا رہا ہے۔چیئرمین سی ڈی اے سہیل اشرف کی مؤثر نگرانی میں اسلام آباد بھر میں بنیادی ڈھانچے کی بہتری کے لئے وسیع پیمانے پر اقدامات کئے جا رہے ہیں، ان میں سڑکوں کی تعمیر و بحالی، انڈر پاسز کی تعمیر، پیدل چلنے والوں کے پلوں کی تعمیر و بہتری اور اہم شاہراہوں کے نیٹ ورک کو اپ گریڈ کرنا شامل ہے۔ ان منصوبوں کا مقصد شہریوں کی آمدورفت کو آسان بنانا، ٹریفک کی روانی بہتر کرنا، پیدل چلنے والوں کی حفاظت کو یقینی بنانا اور شہر کے مختلف علاقوں کے درمیان رابطوں کو مزید مؤثر بنانا ہے۔

شہریوں نے سی ڈی اے کے جاری ترقیاتی اقدامات کو سراہا ہے بالخصوص قیمتی سرکاری اراضی واگزار کرانے، سیکٹرز آئی-12، ای-12 اور سی-14 میں ترقیاتی سرگرمیوں کو تیز کرنے، پارک انکلیو کی بہتری اور سڑکوں، انڈر پاسز اور پیدل چلنے والوں کے پلوں کی تعمیر و بہتری کے اقدامات کو قابلِ تحسین قرار دیا ہے۔عوام نے اسلام آباد بھر میں پارکوں اور جھیلوں کی بہتری، لینڈ سکیپنگ اور باغبانی کے فروغ اور عوامی مقامات کو خوبصورت بنانے کے لئے سی ڈی اے کی کوششوں کو بھی سراہا ہے، ان اقدامات کو شہری سہولیات کی بہتری، روزانہ سفر کرنے والوں کی مشکلات کم کرنے اور رہائشیوں کو صاف ستھرا، سرسبز اور خوشگوار شہری ماحول فراہم کرنے کی جانب اہم پیشرفت قرار دیا جا رہا ہے۔

شہریوں نے اس امر پر زور دیا ہے کہ اسلام آباد کی بہتری، عوامی سہولت میں اضافے اور اسلام آباد کو سرسبز شہر کی حیثیت سے منفرد شناخت برقرار رکھنے کے لئے ان ترقیاتی سرگرمیوں کا تسلسل ضروری ہے تاکہ عوامی مقامات کو بہتر بنانے، شہری سہولیات کو مضبوط کرنے اور وفاقی دارالحکومت کی منظم ترقی کے لئے مسلسل اقدامات کئے جاتے رہیں۔سی ڈی اے اسلام آباد ترقی اور شہری سہولیات کو بہتر بنانے کے لئے پُرعزم ہے۔ سی ڈی اے اسلام آباد کے مختلف سیکٹرز میں ترقیاتی سرگرمیاں جاری رکھے گا جس کا مقصد شہر کو مزید جدید، خوبصورت، سرسبز، قابلِ رسائی اور شہریوں کے لئے ایک بہتر اور مثالی دارالحکومت بنانا ہے۔