وزیرِ خزانہ کی جے پی مورگن کے وفد سے ملاقات، پاکستان کی معاشی صورتِ حال، کریڈٹ ریٹنگ اور مالیاتی حکمتِ عملی پر تبادلۂ خیال

اسلام آباد۔17اکتوبر (اے پی پی):وفاقی وزیرِ خزانہ و محصولات سینیٹر محمد اورنگزیب نے تھائی لینڈ کے شہر بنکاک میں ورلڈ بینک گروپ اور آئی ایم ایف کے سالانہ اجلاسوں 2026 کے موقع پر جے پی مورگن کے وفد سے ملاقات کی۔ ملاقات میں پاکستان کی معاشی صورتِ حال، کریڈٹ ریٹنگ اور مالیاتی حکمتِ عملی پر تبادلۂ خیال کیا گیا۔

وزارتِ خزانہ کی جانب سے ہفتہ کو یہاں جاری اعلامیہ کے مطابق ملاقات کے دوران وفاقی وزیرِ خزانہ نے آئی ایم ایف پروگرام کے تحت پیش رفت، زرمبادلہ کے ذخائر میں اضافے اور عالمی سرمایہ منڈیوں تک دوبارہ رسائی کو اجاگر کرتے ہوئے ساختی اصلاحات کے لیے حکومت کے عزم کا اعادہ کیا۔ دونوں جانب سے پاکستان کو ڈبل بی کریڈٹ ریٹنگ کے درجے تک پہنچانے کے ہدف پر گفتگو ہوئی، جبکہ جے پی مورگن نے اہم معاشی اشاریوں اور ادارہ جاتی بہتری کے حوالے سے تجزیاتی معاونت کی پیشکش کی۔

ملاقات میں سکوک، روپے میں مالیت اور ڈالر میں ادائیگی والے بانڈز، پانڈا بانڈز اور یورو بانڈز کی ممکنہ ٹوکنائزیشن سمیت مالی وسائل کے مختلف ذرائع پر تبادلۂ خیال کیا گیا۔ قرضوں کے مہنگے ذرائع کی جگہ بہتر مالیاتی ذرائع اختیار کرنے اور ادائیگی کی مدت بڑھانے کو ترجیح دینے پر بھی گفتگو ہوئی۔ وزیرِ خزانہ نے عالمی شرحِ سود سے وابستہ خطرات کے تناظر میں مناسب وقت پر مالیاتی لین دین، سرمایہ کاروں سے روابط اور نجی پلیسمنٹ کے لیے انڈر رائٹنگ معاونت کے حوالے سے جے پی مورگن کے مشوروں کو سراہا۔

دونوں جانب سے ملٹی لیٹرل انویسٹمنٹ گارنٹی ایجنسی کی ضمانت سے مالی معاونت، انٹرنیشنل فنانس کارپوریشن کی معاونت سے متنوع ادائیگی حقوق پر مبنی مالیاتی لین دین، روپے میں مالی معاونت اور قرضوں کی ممکنہ تبدیلی کے امکانات کا بھی جائزہ لیا گیا۔ اس کے علاوہ ترسیلاتِ زر کے مستحکم بہاؤ، علاقائی خطرات، قرضوں کے تبادلے، کریڈٹ معاونت اور ضمانت شدہ مالیاتی انتظامات پر بھی گفتگو ہوئی۔