لاہور۔15ستمبر (اے پی پی):پنجاب ایجوکیشن فاؤنڈیشن سے منسلک 10پارٹنر سکولوں کے تقریبا 3سو طلبا وطالبات نے سوشل میڈیا مارکیٹنگ، گرافک ڈیزائننگ اور انٹرپرینیورشپ میں 15روزہ عملی تربیت کا کورس مکمل کر لیا ہے۔ پیف نے ارفع کریم ایجوکیشن سسٹم کے اشتراک سے آئی ٹی کورسز مکمل کرنے والے پیف طلبا کے اعزاز میں ایک پر وقار تقریب کا انعقاد کیا۔جس کے مہمان خصوصی سیکرٹری سکول ایجوکیشن محمد احسن وحید تھے۔ تقریب میں کورس مکمل کرنے والے طلبا و طالبات میں سرٹیفکیٹ تقسیم کیے گئے۔ تقریب سے قبل طلبا و طالبات نے 21 ماڈل پیش کیے جس کی ایو یلیو یشن تھرڈ پارٹی سے کروائی گئی۔
ان ماڈل ایویلیویشن میں بہترین کارکردگی کا مظاہرہ کرنے والے طلبا و طالبات میں لیپ ٹاپ تقسیم کیے گئے۔سیکرٹری سکول نے اپنے خطاب میں کہا کہ ارفع کریم ٹیکنالوجی پارک میں منعقد ہونے والی یہ تقریب طلبا کی لگن، محنت اور ان ضروری شعبوں میں بہترین کارکردگی کا منہ بولتا ثبوت ہے۔اپنی گفتگو کے دوران سیکرٹری سکول نے نوجوانوں کو ڈیجیٹل دور میں ضروری مہارتوں پر عبور حاصل کرنے اور انٹرپرینیورشپ کو فروغ دینے کی اہمیت پر زور دیاتاکہ نوجوان نسل معاشی طور پر خود مختار ہوسکے۔ منیجنگ ڈائریکٹر پیف منظر جاوید علی نے سیکرٹری سکول ایجوکیشن محمد احسن وحید، ارفع کریم فاؤنڈیشن کے چیئرپرسن کرنل ریٹائرڈ امجد عبدالکریم رندھاوا، ارفع کریم فاؤنڈیشن کی وائس چیئرپرسن ثمینہ رندھاوا اور ارفع کریم فاؤنڈیشن کی سی ای او تابندہ اسلام اور دیگر مہمانان گرامی کو تقریب میں آمد پر خوش آمدید کہا۔
تقریب میں پیف بورڈ ممبر عاصمہ وزیری، ڈپٹی منیجنگ ڈائریکٹر (آپریشن) قرا ةالعین میمن، ڈپٹی منیجنگ ڈائریکٹر (سپورٹ سروسز) راجہ محمد اشرف، ڈپٹی منیجنگ ڈائریکٹر (ایف سی آر ایم) محمد فاروق اور دیگر پیف افسران نے شرکت کی۔ تقریب سے خطاب کرتے ہوئے ایم ڈی پیف نے کہا کہ پنجاب ایجوکیشن فاؤنڈیشن نے ارفع کریم ایجوکیشن سسٹم کے تعاون سے گرمیوں کی چھٹیوں میں 10 پیف پارٹنر سکولوں کے 3سو طلبا وطالبات کو سوشل میڈیا مارکیٹنگ، گرافک ڈیزائننگ اور انٹرپرینیورشپ کورسز پر مہارت فراہم کی ہے۔ انہوں نے کہا کہ ارفع کریم فاؤنڈیشن نے نہ صرف پیف سے منسلک طلباو طالبات کو آئی ٹی کورسز پر مہارت فراہم کی
بلکہ پیف کے ایسے سکول جہاں کمپیوٹرز کی کمی کا سامنا تھا وہاں پر لیپ ٹاپ بھی فراہم کیے تاکہ طلباو طالبات باآسانی ان کورسز پر مہارت حاصل کر سکیں۔ انہوں نے تعلیمی میدان میں طلبا کو عملی علم اور ہنر سے آراستہ کرنے پر ارفع کریم کی پوری ٹیم کو خراج تحسین پیش کیا۔انہوں نے مستقبل میں اس طرح کے اقدامات کو آگے بڑھانے کی یقین دہانی کرواتے ہوئے کہا کہ ارفع کریم فانڈیشن کے اشتراک سے پیف سکولوں میں پڑھنے والے تمام طلباو طالبات کو روایتی تعلیم کے ساتھ ساتھ آئی ٹی کورسز پر مہارت فراہم کرنے کا سلسلہ جاری رکھا جائے گا۔
Short Link: https://urdu.app.com.pk/urdu/?p=391167
