Election day banner
31 C
Islamabad
اتوار, جون 23, 2024
ہومقومی خبریںاتحاد سے ہر جنگ جیتی جا سکتی ہے، ہم سب پاکستانی ہیں...

اتحاد سے ہر جنگ جیتی جا سکتی ہے، ہم سب پاکستانی ہیں اور اس کے دفاع اور تحفظ کے لیے ہر قربانی دینے کے لیے تیار ہیں،وزیر داخلہ محسن رضا نقوی

پشاور۔ 11 جون (اے پی پی):وفاقی وزیر داخلہ سید محسن رضا نقوی نے کہا ہے کہ پاکستان بہت قربانیوں کے بعد معرض وجود میں آیا تھا اور ہم سب مادر وطن کے تحفظ اور دفاع کے لیے ہر قربانی دینے کے لیے تیار ہیں۔انہوں نے کہا کہ فرنٹیئر کانسٹیبلری (ایف سی) پاکستان کی ایک اہم فورس ہے جسے اسلام آباد سمیت تمام صوبوں میں سکیورٹی اور امن و امان کی بحالی کے علاوہ وی آئی پیز، اہم منصوبوں اور سرکاری تنصیبات کے تحفظ کے لیے رکھا گیا ہے۔وزیر داخلہ منگل کو یہاں ایف سی ٹریننگ سنٹر شبقدر میں ایف سی شہدا پریڈ 2024 کی شاندار تقریب سے بطور مہمان خصوصی خطاب کر رہے تھے۔پاس آؤٹ ریکروٹس نے وزیر داخلہ کو سلامی پیش کی اور مارچ پاسٹ کیا۔وزیر نے پریڈ کا معائنہ کیا ایف سی بینڈ نے بھی شاندار پرفارمنس کا مظاہرہ کیا جسے وزیر اور شرکاء نے خوب سراہا۔

وزیر داخلہ نے امن و امان اور سکیورٹی کو برقرار رکھنے کے لیے قانون نافذ کرنے والے اداروں کے ساتھ تعاون پر ایف سی کے دستوں کے فوری ردعمل کو سراہا۔انہوں نے کہا کہ اتحاد سے ہر جنگ جیتی جا سکتی ہے۔ انہوں نے کہا کہ ہم سب پاکستانی ہیں اور اس کے دفاع اور تحفظ کے لیے ہر قربانی دینے کے لیے تیار ہیں۔ انہوں نے کہا کہ ایف سی پاکستان کے استحکام، ترقی اور خوشحالی کے لیے کام جاری رکھے گی۔محسن نقوی نے فرنٹیئر کانسٹیبلری کے تمام شہداء کو شاندار خراج عقیدت پیش کیا اور ایف سی شہداء پیکج کو 30 لاکھ روپے سے بڑھا کر 10 ملین روپے کرنے کا اعلان کیا۔ انہوں نے کہا کہ اس بڑے شہداء پیکج کے علاوہ ایف سی کے دستوں کو شہداء پیکج کے تحت دی جانے والی دیگر سہولیات بھی حاصل ہوں گی۔

انہوں نے کہا کہ شہداء کے خاندانوں کو پلاٹوں کی الاٹمنٹ کے لیے کام کرنے کے ساتھ ساتھ شہداء کے نئے پیکج پر بھی جلد عملدرآمد کیا جائے گا۔ اس موقع پر کمانڈنٹ فرنٹیئر کانسٹیبلری معظم جاہ انصاری نے کہا کہ ایف سی کے 405 جوانوں نے دہشت گردی کے خلاف جنگ میں شہادت قبول کی جن میں کمانڈنٹ صفوت غیور شہید بھی شامل ہیں۔انہوں نے کہا کہ تقریباً 3000 ایف سی جوان اسلام آباد میں پولیس کی مدد کے لیے تعینات ہیں اور انہیں وفاقی دارالحکومت میں مناسب رہائش فراہم کرنے کی درخواست کی گئی ہے۔

ایف سی کے شہداء پیکج میں اضافے کے اعلان پر وزیر داخلہ کا شکریہ ادا کرتے ہوئے انہوں نے بلٹ پروف جیکٹس، ہیلمٹ کی فراہمی اور ایف سی کے جوانوں کی تنخواہیں پاکستان کی دیگر افواج کے برابر لانے کی بھی درخواست کی۔وزیر داخلہ کی آمد پر کمانڈنٹ فرنٹیئر کانسٹیبلری معظم جاہ انصاری، انسپکٹر جنرل آف پولیس خیبرپختونخوا اختر حیات گنڈا پور اور ایف سی فورس کے دیگر اعلیٰ افسران نے ان کا استقبال کیا۔ کمانڈنٹ ایف سی نے وزیر داخلہ کو شیلڈ پیش کی۔ وزیر داخلہ نے ایف سی کے جوانوں کی انسداد دہشت گردی فرضی مشقوں کا معائنہ کیا اور انہیں سراہا۔

متعلقہ خبریں
- Advertisment -

مقبول خبریں