سکھر۔ 13 اپریل (اے پی پی):اروڑ یونیورسٹی سکھر کی جانب سے داخلہ ٹیسٹ کا انعقاد کیا گیا ۔ اتوار کو جاری کئے گئے اعلامیہ کے مطابق اروڑ یونیورسٹی آف آرٹ، آرکیٹیکچر، ڈیزائن اینڈ ہیریٹیج، سکھر کی جانب سے داخلہ ٹیسٹ کامیابی سے لیا گیا۔ ملک کے مختلف علاقوں سے ایک ہزار سے زائد امیدواروں نے اس ٹیسٹ میں شرکت کی۔ یہ ٹیسٹ 14 مختلف ڈگری پروگرامز کے لیے لیا گیا جن میں بی ایس سائبر سیکیورٹی، آرٹیفیشل انٹیلیجنس، آرکیٹیکچر، بی ایس سول انجینئرنگ، بی ایس انوائرنمنٹل سائنسز، بی ایس فیشن ڈیزائن، بی ایس ٹیکسٹائل ڈیزائن، بی ایس سیرامک ڈیزائن، بی ایس ویژول آرٹس، بی ایس پاکستان اسٹڈیز، بی ایس تاریخ، بی ایس آثار قدیمہ، بی ایس سیاحت و مہمان نوازی، بی ایس ملٹی میڈیا اینڈ گیمنگ شامل ہیں۔
وائس چانسلر پروفیسر ڈاکٹر زاہد حسین کھنڈ کی نگرانی میں یہ ٹیسٹ یونیورسٹی کے احاطے میں لیا گیا۔ طلبہ کے لیے 20 بلاکس مختص کیے گئے جہاں امیدواروں کے لیے تمام ضروری سہولیات فراہم کی گئیں۔ سی سی ٹی وی کیمرے نصب کیے گئے، کنٹرول روم قائم کیا گیا اور والدین کے لیے بھی علیحدہ جگہ کا بندوبست کیا گیا۔ ٹیسٹ مکمل طور پر محفوظ اور منظم ماحول میں منعقد ہوا جہاں یونیورسٹی کی جانب سے سیکیورٹی کے سخت انتظامات کیے گئے۔
ریسکیو 1122 کی ٹیم، ایمرجنسی موبائل ہیلتھ یونٹ، پولیس سیکیورٹی اور جنرل فزیشن کی موجودگی کو بھی یقینی بنایا گیا تاکہ ٹیسٹ بغیر کسی رکاوٹ کے مکمل ہو سکے۔اروڑ یونیورسٹی ٹیسٹ میں شرکت کرنے والے تمام امیدواروں کے لیے نیک تمناؤں کا اظہار کرتی ہے۔ ٹیسٹ کی "آنسر کی” آج شام 6 بجے یونیورسٹی کی سرکاری ویب سائٹ پر اپلوڈ کی جائے گی ۔
Short Link: https://urdu.app.com.pk/urdu/?p=581311
