اسلام آباد۔1ستمبر (اے پی پی):سپیکر قومی اسمبلی راجہ پرویز اشرف کی کاوشوں سے گرلز کالج منگھوٹ کی طالبات کی سفری مشکلات ختم کرنےکےلئے بس سروس کی فراہمی کا دیرینہ مطالبہ پورا کر دیا گیا۔ قومی اسمبلی سیکرٹریٹ کے مطابق گورنمنٹ ایسوسی ایٹ کالج فار ویمن منگھوٹ کی طالبات کی سفری مشکلات کو دور کرنے کے لئے بسیں اور ہائی ایس وین فراہم کر دی گئیں۔
سپیکر قومی اسمبلی راجہ پرویز اشرف کل ( ہفتے کو) گرلز کالج منگھوٹ میں طالبات کو پک اینڈ ڈراپ کی سہولت فراہم کرنے کےلئے بس سروس کا افتتاح کریں گے۔ یاد رہے کہ سپیکر قومی اسمبلی راجہ پرویز اشرف نے 30 مئی 2023 کو گرلز کالج منگھوٹ کا دورہ کیا اور طالبات کو درپیش سفری مشکلات کو مد نظر رکھتے ہوئے ان کو ٹرانسپورٹ کی سہولیات فراہم کرنے کی یقین دہانی کرائی تھی۔
سپیکر نے گرلز کالج منگھوٹ کی طالبات کو درپیش سفری مشکلات کا معاملہ سابق وزیراعظم میاں محمد شہباز شریف کے سامنے اٹھایا جس پر انہوں نے متعلقہ حکام کو گرلز کالج منگھوٹ کو فوری طور پر بسیں فراہم کرنے کی ہدایات جاری کیں۔
ان بسوں کی فراہمی سے دور دراز سے آنے والی طالبات کو درپیش سفری مشکلات حل ہوں گی اور وہ پہلے سے زیادہ دلجمعی سے اپنی تعلیمی سرگرمیوں میں حصہ لے سکیں گی اور جو طالبات سفری سہولیات میسر نہ ہونے کی وجہ سے تعلیم جاری نہیں رکھ سکتی تھیں امید ہے کہ وہ بھی اپنی تعلیم مکمل کر سکیں گی۔ سپیکر کے اس اقدام پر اہل علاقہ ، طالبات اور ان کے والدین کی طرف سے خوشی کا اظہار کیا گیا ہے ۔ گوجر خان اور اس کے ملحقہ علاقوں میں تعلیم کے فروغ اور علاقے کی ترقی کےلئے سپیکر قومی اسمبلی راجہ پرویز اشرف کی کاوشوں کو سراہا گیا۔
Short Link: https://urdu.app.com.pk/urdu/?p=385108
