اسلام آباد۔22اپریل (اے پی پی):انسپکٹر جنرل آف پولیس اسلام آباد سید علی ناصررضوی کے خصوصی احکامات کی روشنی میں اسلام آبادپولیس کے غازیان کے اعزاز میں ریسکیو 15 فیلڈ آفس میں ’’غازی ویک‘‘ کے دوسرے دن تقریب کا انعقادکیا ۔ ترجمان کے مطابق تقریب میں ڈی آئی جی اسلام محمد جواد طارق،ایس ایس آپریشنز آسلام آباد محمد شعیب خان، ایس پی ڈولفن ،زونل ایس پیز اور اسلام آباد پولیس کے غازیان نے شرکت کی۔
تقریب سے خطاب کرتے ہوئے ڈی آئی جی محمد جواد طارق نے کہاکہ آج کا دن ہمارے لیے صرف باعث فخر نہیں بلکہ تجدید عہد بھی ہے،اپنی بہادری، فرض شناسی، قربانی کے جذبے سے سر شار جوانوں کو خراج تحسین پیش کرتاہوں۔ انہوں نے کہا کہ اسلام آباد کو پر امن شہر بنا کر پولیس فورس کا وقار بلند کرنے والے ہمارے ماتھے کا جھومر ہیں، ملک و قوم کی خدمت کے دوران قربانی کا جذبہ کسی بھی قوم کے بہادر سپوتوں کو نصیب ہوتا ہے۔ انہوں نے مزید کہا کہ ہم اپنے غازیان کو ہمیشہ یاد رکھیں گے، ملک و قوم کے لیے قربانی دینے والوں کے خاندان بھی باعث احترام ہیں۔
انہوں نے کہا کہ دہشت گردی کی جنگ لڑنے والوں کو دی جانے والی مراعات ان کی قربانی کا نعم البدل نہیں، اپنے آج کو دوسرے کے کل کے لیے قربان کرنے والوں کو تاریخ ہمیشہ یاد رکھتی ہے۔ تقریب کے دوران غازیان نے اپنے خیالات کا اظہار کیااور عزت افزائی پر آئی جی اسلام آباد اور ان کی ٹیم کی خصوصی کاوشوں کو بھی سراہا۔
Short Link: https://urdu.app.com.pk/urdu/?p=586091
