اسلام آباد۔22اپریل (اے پی پی):اسلام آباد ہائیکورٹ کے جسٹس محسن اخترکیانی نے پولش خاتون کی اپنی بیٹی کی پاکستانی والد سے حوالگی کی درخواست میں بچی کی ہفتہ وار ویڈیولنک پر والدہ سے بات کرانے کا حکم دیتے ہوئے ہدایت کی کہ والد عدیل خان ہر ہفتے بچی کی والدہ سے بات کروا کر آئندہ سماعت پر رپورٹ جمع کرائے ۔ گزشتہ روز سماعت کے دوران عدالتی حکم پر والد عدیل خان نے بچی کو عدالت میں پیش کر دیا جبکہ بچی انیتا مریم خان کی والدہ اننا مونیکا ویڈیولنک کے ذریعے عدالت کے سامنے پیش ہوئی۔ جسٹس محسن اختر کیانی کی ہدایت پر بیٹی کی ویڈیولنک پر والدہ سے الگ کمرے میں بات کرائی گئی،جس کے بعد عدالت نے استفسار کیاکہ بچی کی اپنی والدہ سے بات ہو گئی، کیا وہ ماں کو پہچانتی ہے؟
درخواست گزار وکیل نے کہا کہ بچی کی عمر ساڑھے چار سال ہے،جب پاکستان لایا گیا تو ڈیڑھ سال کی تھی،بچی کی تین سال بعد اس کی والدہ سے پہلی بار بات ہوئی ہے،بچی کو بتایا تو اس نے ماں کو پہچان لیا لیکن زیادہ بات نہیں کی۔ جسٹس محسن اختر کیانی نے کہاکہ اس وقت تو عدالت آپ کا بیٹی کے ساتھ ویڈیولنک پر رابطہ بحال کر سکتی ہے،وکیل نے کہاکہ پولینڈ کی عدالت میں جون میں سماعت ہے، عدالت نے بچی کو پیش کرنے کا کہا ہوا ہے،بچی کا والد دو سال سے اس آرڈر پر عملدرآمد نہیں کر رہا۔ دوران سماعت جسٹس محسن اختر کیانی نے بچی کے والد عدیل خان کو روسٹرم پر طلب کر لیا اور استفسار کیاکہ کیا آپ پولینڈ کی عدالت کی کارروائی میں شریک ہو رہے ہیں؟
والد عدیل خان نے کہاکہ میں بچی کو لے جانا چاہتا تھا لیکن اس نے مجھے جان سے مارنے کی دھمکی دی،میں پولینڈ چھوڑ کر پاکستان آ چکا ہوں، شہریت بھی نہیں ہے،دو سال پہلے بچی کی والدہ سے بات بھی کرائی لیکن اس نے مجھے دھمکیاں دیں،والدہ نے بچی کو بھی مارنے کی کوشش کی، پولینڈ کی عدالت میں کیس میں لے کر گیا تھا،میرا جون میں پولینڈ جانے کا پروگرام ہے لیکن اگر نہیں جاتا تو میرا وکیل پیش ہو گا۔ عدالت نے کیس کی مزید سماعت 9 جولائی تک ملتوی کر دی۔
Short Link: https://urdu.app.com.pk/urdu/?p=586055
