اسلام آباد ہائی کورٹ :ایڈیشنل جج جسٹس راجہ انعام امین منہاس قانونی امور کے جج مقرر

اسلام آباد۔10فروری (اے پی پی):اسلام آباد ہائی کورٹ کے جسٹس بابر ستار اور جسٹس سردار اعجاز اسحٰق خان سے عدالت کے قانونی امور کی ذمہ داری واپس لے لی گئی اور ان کی جگہ ایڈیشنل جج جسٹس راجہ انعام امین منہاس کو قانونی امور کا جج مقرر کیا گیا ہے۔

اسلام آباد ہائی کورٹ کے چیف جسٹس عامر فاروق کی منظوری سے ڈپٹی رجسٹرار نے نوٹیفکیشن جاری کر دیا جس کے مطابق جسٹس راجہ انعام امین منہاس اسلام آباد ہائی کورٹ کےقانونی ونگ کے امور کو سپروائز کریں گے۔نوٹیفکیشن میں کہا گیا ہے کہ جسٹس راجہ انعام امین منہاس کو عوامی مفاد میں فوری طور پر قانونی امور کا جج مقرر کیا جاتا ہے۔2022 میں جسٹس بابر ستار اور جسٹس سردار اعجاز اسحٰق کو قانونی ونگ کو سپروائز کرنے کی ذمہ داری دی گئی تھی۔

Short Link: https://urdu.app.com.pk/urdu/?p=558658