کراچی۔ 01 ستمبر (اے پی پی):اعلی ثانوی تعلیمی بورڈ کراچی نے انٹرمیڈیٹ بارہویں جماعت آرٹس پرائیویٹ گروپ کے سالانہ امتحانات برائے 2025 کے نتائج کا اعلان کردیا ہے۔پیر کو جاری اعلامیہ کے مطابق چیئرمین انٹربورڈ کراچی فقیر محمد لاکھو نے نتائج کا اعلان کرتے ہوئے بتایا کہ آرٹس پرائیویٹ گروپ کے امتحانات میں پہلی تینوں پوزیشنیں طالبات نے حاصل کی ہیں۔آرٹس پرائیویٹ گروپ کے امتحانات میں کرن بنت عبدالرحمن رولنمبر 35719 نے ٹوٹل 1100میں سے 876نمبرز اے ون گریڈ کے ساتھ پہلی پوزیشن، اریبہ بنت عبدالرشید رول نمبر 35844 نے 872نمبرز اے گریڈ کے ساتھ دوسری پوزیشن، الفیہ شاہ بنت محمد شاہد رول نمبر 35374 نے 864 نمبرز اے گریڈ کے ساتھ تیسری پوزیشن حاصل کی۔
ناظم امتحانات زرینہ راشد نے نتائج کی تفصیلات بتاتے ہوئے کہا کہ آرٹس پرائیویٹ گروپ کے امتحانات میں 2791امیدواروں نے رجسٹریشن حاصل کی جبکہ 2615امیدوار امتحانات میں شریک ہوئے جس میں سے 1187 امیدوار کامیاب قرار پائے ،اس طرح کامیابی کا تناسب 45.39فیصد رہا۔انہوں نے کہا کہ ان امتحانات میں 1امیدوار اے ون گریڈ، 63اے گریڈ، 252بی گریڈ، 417 سی گریڈ، 383 ڈی گریڈ، 46 ای گریڈ میں کامیاب ہوئے جبکہ 25امیدوار پاس ہوئے۔ نتائج بورڈ کی ویب سائٹ www.biek.edu.pkپر اپ لوڈ کردیئے گئے ہیں۔ امیدوا ر اپنے نتائج اعلی ثانوی تعلیمی بورڈ کراچی کی آفیشل اینڈرائڈ ایپ پر بھی دیکھ سکتے ہیں۔ اینڈرائڈ ایپ کو گوگل پلے اسٹور پرBIEKکے نام سے سرچ کر کے موبائل میں انسٹال کیا جاسکتا ہے۔ چیئرمین فقیر محمد لاکھو نے کامیاب ہونے والی طالبات کو مبارکباد دیتے ہوئے کہا ہے کہ انٹرمیڈیٹ کے تمام گروپس کے نتائج کے اعلان کے بعد پوزیشن ہولڈرز طلبہ کی حوصلہ افزائی کیلئے ان کے اعزاز میں تقریب منعقد کی جائے گی جس میں طلبہ کے ساتھ والدین، اساتذہ اور میڈیا کو بھی مدعو کیا جائے گا۔
