اسلام آباد۔13مئی (اے پی پی):وزیرِ اعظم محمد شہباز شریف نے معرکہ حق کے شہدا کو خراج عقیدت پیش کرتے ہوئے کہا ہے کہ افواج پاکستان کے بہادر افسروں اور جوانوں نے مادر وطن کے دفاع کے لئے قوم سے کیا ہوا عہد پورا کردیا، پوری قوم کو اپنے شہدا اور ان کے اہل خانہ پر فخر ہے۔ منگل کو وزیر اعظم آفس کے میڈیا ونگ کی جانب سے جاری بیان کے مطابق وزیر اعظم نے کہا کہ اپنے بہادر سپوتوں کی قربانیوں کو قوم کبھی فراموش نہیں کرے گی۔
وزیر اعظم نے ارض وطن کے تحفظ کے دوران پاک فضائیہ کے 5 اور پاک فوج کے 6 افسران و جوانوں کی شہادت پر انہیں نذرانہ عقیدت پیش کیا۔ وزیر اعظم نے کہا کہ ہم نے نہ صرف ملک کا بھرپور دفاع کیا بلکہ پاکستان کی سالمیت اور خودمختاری پر کوئی آنچ نہیں آنے دی۔ وزیر اعظم نے کہا کہ مجھ سمیت پوری قوم کو اپنے شہدا اور ان کے اہل خانہ پر فخر ہے۔ اپنے بہادر سپوتوں کی قربانیوں کو قوم کبھی فراموش نہیں کرے گی۔
وزیرِ اعظم نے بھارتی جارحیت کے نتیجے میں 15 کم سن بچوں اور 7 خواتین سمیت 40 معصوم لوگوں کی شہادت پر گہرے دکھ اور رنج کا اظہار کرتے ہوئے کہا کہ ہم شہدائے وطن کو بھولے ہیں نہ بھولیں گے اور ان کے اہل خانہ کو تنہا نہیں چھوڑیں گے۔ وزیرِ اعظم نے کہا کہ شہدا پیکیج کا اعلان کیا جاچکا ہے ، شہدا کے اہل خانہ کی کفالت کی ذمہ داری ریاست بھرپور طور سے انجام دے گی ۔
وزیرِ اعظم نے شہدا کے درجات کی بلندی اور ان کے اہل خانہ کیلئے صبر جمیل کی دعا کی۔ انہوں نے کہا کہ آپریشن’’ بنیان مرصوص ‘‘نے بھارت کو بھرپور جواب دیا گیا اور اس پر واضح کردیا گیا کہ اسے خطے میں موجود دوسرے ممالک کی سالمیت اور خودمختاری کا احترام کرنا ہوگا۔
معرکہ حق میں افواج پاکستان نے بھارت کی عددی برتری کی خوش فہمی اور غرور کو خاک میں ملا دیا۔ وزیرِ اعظم نے معرکہ حق میں زخمیوں کی جلد صحت یابی کی دعا کی۔ انہوں نے کہا کہ ہم پر امن قوم ہیں، مگر کسی بھی جارحیت کا جواب دینا جانتے ہیں اورآپریشن’’ بنیان مرصوص‘‘ اس کا واضح ثبوت ہے۔
Short Link: https://urdu.app.com.pk/urdu/?p=596465
