اسلام آباد۔23جنوری (اے پی پی):اقوام متحدہ کی جنرل اسمبلی نے ” مذہبی مقامات کے تحفظ کے لئے امن اور رواداری کی ثقافت کو فروغ ” دینے سے متعلق پاکستان اور متعدد او آئی سی ممالک کی جانب سے پیش کردہ قرارداد متفقہ طور پر منظور کی ہے۔ وزیر اعظم عمران خان کے وژن کے مطابق ، یہ قرارداد مذہبی مقامات کے تحفظ ، بین المذاہب ہم آہنگی کے فروغ اور مذہب یا عقیدے کی بنیاد پر عدم رواداری کا مقابلہ کرنے کے لئے پاکستان کی جاری سفارتی کوششوں کا حصہ ہے۔ہفتہ کو ترجمان دفتر خارجہ کے مطابق مذہبی شخصیات اور مقامات کی بے حرمتی ، اور دنیا بھر میں بڑھتی ہوئی مذہبی انتہا پسندی اور عدم رواداری کے حالیہ واقعات کے پس منظر میں ، اس قرار داد کا مقصد اس طرح کے منفی رجحانات کو روکنا ہے۔قرارداد میں مذہب یا عقیدے کی بنیاد پر ہر طرح کے تشدد ، امتیازی سلوک ، عدم برداشت ، مذہبی منافرت اور مذہبی مقامات ، پر حملوں اور مذہب کی جبری تبدیلی کی مذمت کی گئی ہے۔سعودی عرب ، پاکستان ، یمن ، متحدہ عرب امارات ، مراکش ، عمان ، بحرین اور مصر پر مشتمل ان سرکردہ ممالک کی اجتماعی کاوشوں کی وجہ سے اس قرار داد کو اقوام متحدہ کی جنرل اسمبلی نے اتفاق رائے سے منظور کیا۔
