ہری پور۔ 17 مئی (اے پی پی):امریکی سفارت خانے کے ایک اعلیٰ سطحی وفد کا خان پور میں واقع ہزاروں سال پرانی بدھ مت تہذیب کے اہم آثار، جولیاں اسٹوپہ کا دورہ کیا۔اس موقع پر ریجنل آفیسر آرکیالوجی ڈیپارٹمنٹ ہزارہ ڈویژن سید نیاز حسین شاہ، اور راجہ عدنان نے وفد کا پرتپاک استقبال کیا۔ وفد نے جولیاں اسٹوپہ میں موجود تاریخی ورثے کا تفصیلی جائزہ لیا اور ان نایاب آثار قدیمہ کو انتہائی قیمتی ثقافتی خزانہ قرار دیا۔
وفود کے ارکان کا کہنا تھا کہ خیبرپختونخوا آرکیالوجی ڈیپارٹمنٹ نے نہ صرف ان مذہبی عبادت گاہوں کی حفاظت کی بلکہ ان کی بحالی اور دیکھ بھال کے ذریعے مذہبی سیاحت کو فروغ دینے میں بھی قابل تعریف کردار ادا کیا ہے۔امریکی وفد کا کہنا تھا کہ ایسے اقدامات سے بین الاقوامی سیاحوں کی دلچسپی بڑھے گی جس سے نہ صرف بین المذاہب ہم آہنگی کو فروغ ملے گا بلکہ مقامی معیشت بھی مستحکم ہوگی۔ انہوں نے خیبرپختونخوا حکومت کی کوششوں کو سراہا اور مستقبل میں ثقافتی تعاون کے امکانات پر بھی تبادلہ خیال کیا۔
Short Link: https://urdu.app.com.pk/urdu/?p=598149
