ممبئی ۔22مئی (اے پی پی):بورڈ آف کنٹرول فار کرکٹ ان انڈیا (بی سی سی آئی )کے زیراہتمام انڈین پریمیئر لیگ (آئی پی ایل) کا 18واں ایڈیشن بھارت میں جاری ہے جس میں شائقین کرکٹ کو انتہائی دلچسپ اور کانٹے دار مقابلے دیکھنے کو مل رہے ہیں،لیگ میں کل (جمعہ کو)مزید ایک میچ کھیلا جائے گا ۔
لیگ کا 65واں میچ رائل چیلنجرز بنگلورو اور سن رائزرز حیدرآباد کی ٹیموں کے درمیان بھارت رتن شری اٹل بہاری واجپائی ایکنا کرکٹ سٹیڈیم، لکھنؤ میں کھیلا جائے گا ۔رائل چیلنجرز بنگلورو کی ٹیم کو مایہ ناز بلے باز رجت پاٹیدا لیڈ کریں گے جبکہ سن رائزرزحیدرآباد کو آسٹریلیا کے مایہ ناز آل رائونڈر پیٹ کمنز لیڈ کریں گے ۔ رائل چیلنجرز بنگلوو کی ٹیم سب سے زیادہ 17 پوائنٹس کے ساتھ ٹیبل پر دوسری پوزیشن پر ہے جبکہ سن رائزرزحیدرآباد کی ٹیم جو ناک آئوٹ رائونڈ کے لئے بھی کوالیفائی نہیں کر پائی ہے 8 پوائنٹس کے ساتھ آٹھویں نمبر پر ہے۔ لیگ کے 18ویں ایڈیشن میں شامل 10 ٹیموں کےدرمیان فائنل سمیت مجموعی طور پر74میچ کھیلے جائیں گے ۔
لیگ میں کولکتہ نائٹ رائیڈرز کی ٹیم ٹائٹل کا دفاع کے لئے کوشاں ہے ۔ لیگ میں شامل 10 ٹیموں میں دفاعی چیمپئن کولکتہ نائٹ رائیڈرز کے علاوہ دیگر ٹیموں میں چنائی سپر کنگز،گجرات ٹائٹنز ،ممبئی انڈینز، دہلی کیپٹلز، پنجاب کنگز، راجستھان رائلز، رائل چیلنجرز بنگلور ، سن رائزرز حیدر آباد اور لکھنؤ سپر جائنٹس شامل ہیں۔واضح رہے کہ چنائی سپر کنگز اور ممبئی انڈینز کو سب سے زیادہ پانچ پانچ بار آئی پی ایل کا ٹائٹل جیتنے کا اعزاز حاصل ہے ، کولکتہ نائٹ رائیڈرز نے تین جبکہ راجستھان رائلز، سن رائزرز حیدر آباد ، دکن چارجرز اور گجرات ٹائٹنز نے ایک ایک بار چیمپئن ہونے کا اعزاز حاصل کیا ۔آئی پی ایل کا فائنل میچ بھی کولکتہ میں 25 مئی کو شیڈول ہے۔
Short Link: https://urdu.app.com.pk/urdu/?p=600031
کھیلا جائے گا){kind=link}