اسلام آباد۔17اگست (اے پی پی):ایران جوہری مذاکرات میں اپنی کسی بھی ریڈ لائنز سے پیچھے نہیں ہٹے گا۔ چینی خبر رساں ادارے کے مطابق ایران کی سپریم نیشنل سکیورٹی کونسل کے سیکرٹری علی شمخانی نے پارلیمنٹ کی قومی سلامتی اور خارجہ پالیسی کمیٹی کے اراکین کے ساتھ ملاقات کے دوران کہا کہ ایران 2015 کے جوہری معاہدے کی بحالی پر بات چیت کے دوران اپنی کسی بھی متعین حد سے پیچھے نہیں ہٹے گا ۔
انہوں نے مزید کہاکہ جوہری معاہدے سے زیادہ ایرانی قوم کے مفادات کا تحفظ ضروری ہے۔ ایران کی معیشت کو جوہری مذاکرات سے منسلک نہ کرنے کی حکومت کی پالیسی پر تبصرہ کرتے ہوئے،انہوں نے کہا کہ دسمبر 2020 میں پارلیمنٹ کی طرف سے منظور کیا گیا قانون حکومت کو امریکی پابندیوں کا مقابلہ کرنے اور ایران کے مفادات کے تحفظ کے لیے اچھی صلاحیت فراہم کرتا ہے۔
جوہری مذاکرات کا تازہ ترین دور پانچ ماہ کے وقفے کے بعد اگست کے اوائل میں آسٹریا کے دارالحکومت ویانا میں منعقد ہوا۔ 8 اگست کو، یورپی یونین نے جوہری معاہدے کو بحال کرنے کے فیصلے کے مسودے کا "حتمی متن” پیش کیا۔قبل ازیں، ایران نے اعلان کیا تھا کہ اس نے یورپی یونین کے ممکنہ معاہدے کے مسودے کے بارے میں اپنا تحریری جواب پیش کر دیا ہے۔
ایرانی حکام کا کہنا تھا کہ اگر امریکی ردعمل میں حقیقت پسندی اور لچک دکھائی گئی تو جوہری معاہدہ بحال ہو جائے گا۔2015 کے جوہری معاہدے کی بحالی پر بات چیت اپریل 2021 میں ویانا میں شروع ہوئی تھی۔
