ملتان۔ 29 اگست (اے پی پی):پاکستان کرکٹ ٹیم کے کپتان بابر اعظم نے کہا ہے کہ ایشیا کپ میں کسی حریف کو آسان نہیں لیں گے،سری لنکا میں افغانستان کو کلین سویپ شکست دے کر پاکستانی ٹیم کا مورال بلند ہے، جیت کے مومینٹم کو برقرار رکھنے کیلئے ہر ممکن کوشش کریں گے،پورا ایشیاء کپ پاکستان میں ہوتا تو خوشی ہوتی،لیکن اب جو شیڈول ہے اسکے حوالے سے مکمل تیار ہیں،بطور کھلاڑی کہیں بھی کھیلنے کیلئے تیار ہیں،ہمارے کوچز نے کھلاڑیوں کی ٹریول شیڈول کے حساب سے تیاری کی ہے،ایشیاء کپ جیتنے کی بھرپور کوشش کریں۔
ان خیالات کا اظہار انہوں نے منگل کو یہاں ملتان میں پریس کانفرنس کرتے ہوئے کیا۔ بابر اعظم نے کہا کہ ایشیاء کپ کا افتتاحی میچ نیپال کے خلاف ہے،ہم نے نیپال کی ٹیم کی اسٹرینتھ اور کمزوری کو دیکھا ہے،کرکٹ میں کسی بھی حریف کو آسان نہیں لے سکتے،نیپال کے خلاف پوری پلاننگ کیساتھ میدان میں اتریں گے، نیپال کے خلاف پہلے میچ میں کامیابی کے ذریعے ایشیاء کپ میں فتوحات کا آغاز کریں گے،پاکستان اور بھارت کا میچ ہمیشہ ہی اہم ہوتا ہے،روائتی حریف بھارت کے خلاف زیادہ اعتماد کے ساتھ کھیلنا چاہتے ہیں۔
بابراعظم نے کہا کہ پاکستان ٹیم پر طرح طرح کی باتیں ہوئیں، کسی نے اعتراضات کیےکسی نے تعریف بھی کی، ہمارا فوکس کرکٹ پر رہا جس کی وجہ سے ون ڈے میں نمبر ون ٹیم بنے ہیں،نمبر ون ٹیم ہونے پر بطور کپتان اور کھلاڑی فخر ہے۔کپتان قومی کرکٹ ٹیم نے کہا کہ ایشیاء کپ میں ٹریولنگ شیڈول ایسا بنایا ہے کہ آرام بھی مل رہا ہے، سینٹرل کنٹریکٹ پر جلد اچھی خبر ملے گی، تمام تر مسائل کے باوجود فوکس کرکٹ پر رہاہے۔
بابر اعظم نے کہا کہ جب مجھے کپتانی ملی تھی تو میں نے کوشش کی تھی ٹیم کا مائنڈ سیٹ تبدیل کرنا ہے،لوگوں کی توقعات اور بڑھ گئی ہیں جوکہ ہمیں پوری کرنی ہیں، میرا مقصد یہ ہے کہ ٹیم کو فائدہ ہو، انفرادی سطح پر سوچنا چھوڑ دیا ہے، ٹیم کی کامیابی کے حوالے سے سوچتا ہوں۔انہوں نے کہا کہ ہمارے سارے پلیئرز مختلف لیگز میں گئے ہوئے تھے، سب کو مختلف ٹاسک دیے گئے تھے، کوچز نے جس طرح پلیئرز کو دیکھا اور لے کر چلے بہت اچھا کام کیا۔
ورلڈ کپ سکواڈ کے حوالے سے پوچھے گئے ایک سوال کے جواب میں بابر اعظم نے کہا کہ موجودہ ٹیم کے کھلاڑی اچھا کھیل رہے،ورلڈ کپ تک کچھ بھی ہوسکتا ہے کسی کو انجری بھی ہوسکتی ہے لیکن مجھے اس وقت جو ٹیم ہے وہ بہترین لگ رہی ہے ، ابھی ورلڈ کپ میں ٹائم ہے اگر کوئی تبدیلی کرنی پڑی تو ابھی چانس ہے۔
نیپال ٹیم کے کپتان روہت پاوڈل نے میڈیا سے گفتگو میں کہا کہ ہم نے زمبابوے کیخلاف جیت کر ایشیا کپ میں کوالیفائی کیا ہے،ہم پہلی بار ایشیا کپ کھیل رہے ہیں، یہ اچھی بات ہے کہ ہم ایشیا کپ کھیل رہے ہیں،
پاکستان کی ٹیم اچھی اور مضبوط ہے، پاکستان کی ٹیم تجربہ کار ہے جس کا ان کو فائدہ ہے لیکن ہم نے بھی ایشیا کپ کیلئے اچھی تیاری کی ہے۔انہوں نے کہا کہ پاکستان میں بہت انجوائے کررہے ہیں،پاکستان کے لوگ بہت اچھے ہیں بہت محبت مل رہی ہے۔
نیپالی ٹیم کے کپتان نے کہا کہ پاکستان کرکٹ ٹیم کے وکٹ کیپر محمد رضوان ہمارے کھلاڑیوں کے پاس آئے اوربات چیت کی،رضوان نے ہم سے اپنا تجربہ شیئر کیا ان سے بات کر کےاچھا لگا۔بعدازاں دونوں ٹیموں کے کھلاڑیوں نے گراونڈ میں پریکٹس کی،کھلاڑیوں نے باولنگ،بیٹنگ اور فیلڈنگ سمیت تمام شعبوں میں بھرپور پریکٹس کی۔
