روم۔22مئی (اے پی پی):ایکواڈورکے سائیکلسٹ رچرڈ کاراپازنے گیرو ڈی اٹالیہ سائیکل ریس کا گیارہواں مرحلہ جیت لیا۔ 31 سالہ رچرڈ کاراپازکی یہ گیروڈی اٹالیہ ریس میں پہلی سٹیج فتح ہے۔ البانیہ سے گیرو ڈی اٹالیہ کا 108 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔
گیرو ڈی اٹالیہ سائیکل ریس کے گیارہویں مرحلے میں سائیکل سواروں نے ویراجیو سے سیسٹیل نوونی مونٹی تک کا فاصلہ طے کرنا تھا جو کہ پہاڑی راستے پر 186 کلو میٹر پر محیط تھا۔31 سالہ ایکواڈورکے سائیکلسٹ رچرڈ کاراپازنے عمدہ سائیکلنگ کا مظاہرہ کرتے ہوئے 186کلومیٹر کا فاصلہ 4گھنٹے35 منٹ اور 20 سیکنڈز میں طے کرکے گیارہویں مرحلے میں پہلی پوزیشن حاصل کی۔21 سالہ میکسیکو کے سائیکل سوار آئزک ڈیل ٹورو نے گیارہویں مرحلے میں دوسری جبکہ 30 سالہ میزبان سائیکلسٹ جیولیو سیکون نے تیسری پوزیشن حاصل کی۔
ریس میں ڈنمارک کے سائیکلسٹ میڈس پیڈرسن کا پنک جرسی پر قبضہ تاحال برقرار ہے ۔گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹس شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3443.3 کلو میٹر کا سفر طے کرینگے۔ گیرو ڈی اٹالیہ سائیکل ریس میں 23 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد یکم جون کو اختتام پذیر ہوگی۔
Short Link: https://urdu.app.com.pk/urdu/?p=600007
