راولپنڈی۔6دسمبر (اے پی پی):انسداد منشیات فورس (اے این ایف )نے گزشتہ ایک ہفتے کے دوران منشیات اسمگلنگ میں ملوث 6 خواتین کوگرفتارکیا ہے ۔اے این ایف ہیڈکوارٹر راولپنڈی سے جاری رپورٹ کے مطابق ایک ہفتہ میں 5 کارروائیوں کے دوران گرفتار خواتین سے 26 کلوگرام سے زائد منشیات برآمد کی گئی۔گرفتار خواتین بین الصوبائی اور بین الاقوامی سطح پر منشیات اسمگلنگ میں ملوث ہیں۔
خواتین کا تعلق مختلف منشیات اسمگلنگ گروہوں کے ساتھ ہونے کا انکشاف ہوا ہے۔ترجمان نے کہا کہ منشیات اسمگلنگ کیلئے خواتین کو استعمال کیا جانا خطرناک عمل ہے۔اے این ایف خواتین کے تحفظ کو یقینی بنانے کے لیے تمام وسائل بروئے کار لا رہی ہے۔علامہ اقبال انٹرنیشنل ایئرپورٹ پر خاتون کے پیٹ سے 87 ہیروئن بھرے کیپسول برآمد ہوئے۔ملتان انٹرنیشنل ائیرپورٹ پر خاتون سمیت 2 ملزمان کو گرفتار کیا گیا۔ساہیوال کی رہائشی اقصیٰ اور نور احمد کے بیگ سے 855 گرام آئس برآمد ہوئی۔
علامہ اقبال انٹرنیشنل ایئرپورٹ پر خاتون کے بیگ سے 1.942 کلوگرام آئس برآمد کی گئی۔کراچی کے علاقے اورنگی ٹاؤن میں کارروائی کے دوران 2 خواتین کو گرفتار کیا گیا۔کراچی کی رہائشی صائمہ اور شریفہ بی بی کے قبضے سے 22.8 کلوگرام چرس برآمد کی گئی۔ اسلام آباد چونگی نمبر 26کے قریب پشاور کی رہائشی امینہ نامی خاتون کو گرفتار کیا گیا۔ملزمہ کے قبضے سے 500 گرام چرس اور 250 گرام آئس برآمد کی گئی۔
Short Link: https://urdu.app.com.pk/urdu/?p=417156
