باغ۔ 24 فروری (اے پی پی):آزاد حکومت کے وزیراطلاعات پیر مظہر سعید شاہ نے کہا ہے آج کے جدید اور سائنسی دور میں بچوں کو اعلیٰ تعلیم کے ساتھ ساتھ سائنسی اودینی تعلیم سے آراستہ کرنا وقت کی اہم ضرورت ہے،روائتی تعلیم کا اب کوئی فائدہ نہیں ہے،ہمیں اپنے بچوں کو دور جدید کے تقاضوں کا خیال رکھتے ہوئے بچوں کو اس کی صلاحیتوں کے عین مطابق تعلیم سے آراستہ کیا جائے۔
ان خیالات کا اظہار انہوں نے علامہ اقبال سکول وکالج باغ کے سالانہ تقسیم انعامات کی تقریب سے بحیثیت مہمان خصوصی خطاب کرتے ہوئے کیا ،تقریب کی صدارت مولانا امین الحق فاروقی نے کی۔ انہوں نے کہا کہ باغ کے اندر کوالٹی آف ایجوکیشن،اور دینی تعلیم میں، مقابلہ کی فضا میں علامہ اقبال ماڈل سکول و کالج کا کلیدی رول ہے، جدت کے دور میں روایتی تعلیم کے بجائے ٹیکنالوجی پر فوکس کرنا ہو گا،کہ دنیا کی کوئی طاقت فلسطین اور کشمیریوں کو آزادی کی نعمت سے نہیں روک سکتی،کشمیری اور فلسطینی نہتے عوام نے طاقتور ملکوں کا مقابلہ کر کے ثابت کردیا کہ یہ آزادی کے بغیر کوئی آپشن قبول نہیں کریں گے۔
نوجوان نسل اپنی صلاحیتوں کو مثبت کاموں میں صرف کرتے ہوئے تحریک آزادی کشمیر کے لیے سوشل میڈیا پر بھارتی عزائم کو پوری دنیا کے سامنے بے نقاب کریں۔جدید دنیا کے مقابلہ کے لیے جدید تعلیم کا حصول جب تک ممکن نہیں ہو سکتا ہم ان صفوں میں پیچھے رہ جائیں گے۔
تقریب میں رنگا رنگ پروگرامات پیش کیے گئے جن کو سامعین نے بے حد پسند کیا۔تقریب میں نمایاں پوزیشن حاصل کرنے والے طلبہ وطالبات کو شیلڈ ز اور میڈلز سے بھی نوازا گیا۔نمایاں پوزیشن حاصل کرنے والے طلبا کو پیر مظہر سعید شاہ نے اپنے دست مبارک سے شیلڈ دیں،جبکہ تقریب سے ڈسٹرکٹ ایجوکیشن آفیسر سلطان علی طاہر، پرنسپل ادارہ عاشق حسین،وائس پرنسپل سیف اللہ شوکت،راجہ سرفراز،مولانا مقصود توحیدی،سردار صیاخان کونسلر،مولانا لقمان،ملک سرفراز،محمد یاسر،قاری گلزار،مولانا سرور نقشبندی،مولانا یاسر،عبداللہ،ودیگر نے بھی خطاب کیا۔تقریب سے خطاب کرتے ہوئے پیرمظہر سعید شاہ نے کہا کہ حکومت لوگوں کو سہولیات کی فراہمی کے ساتھ ساتھ دنیاوی ودینی تعلیم کے میدان میں بھی مثبت تبدیلیاں لائے گے باغ کے اندر ایسا ادارہ کسی نعمت سے کم نہیں ہے۔
انہوں نے کہا کہ علامہ اقبال سکول اینڈ کالج کے اداروں کی حکومت بھرپور معاونت اور سپورٹ کرے گی جو دینی تعلیم پر خصوصی دلچسپی لے رہی ہے پرائیویٹ سیکٹر نے سرکاری اداروں کا ایک بڑا بوجھ اپنے سر لیا ہوا ہے جوکہ قابل ستائش اقدام ہے۔انہوں نے کہا کہ آزاد کشمیر میں ٹیلنٹ کی کوئی کمی نہیں اگر ہمارے بچوں کو نیشنل وانٹرنیشنل سہولیات میسر ہوں تو یہ دنیا کا مقابلہ کر کے اپنے ملک وقوم کا نام روشن کر سکتے ہیں۔سکول کے وائس پرنسپل سیف اللہ شوکت نے کہا کہ میں تمام معزز مہمانوں کا دلی طور پر شکریہ ادا کرتا ہوں کہ انہوں نے ہمارے اس پروگرام میں شرکت کر کے ہماری حوصلہ افزائی کی ہے۔ ہماری کوشش ہے کہ ہم بچوں کو دینی تعلیم کے ساتھ دور جدید کے عین مطابق بچوں کو تعلیم وتربیت دے سکیں،جس کے لیے ہمارا سٹاف ہمہ وقت کوشاں ہے۔
Short Link: https://urdu.app.com.pk/urdu/?p=565463
