اسلام آباد۔13مارچ (اے پی پی):بولان جعفر ایکسپریس حملے میں شہید ہونے والے 4 شہداء کی میتیں اسلام آباد ائیرپورٹ پہنچ گئیں۔ جمعرات کو وفاقی وزیر برائے مذہبی امور و بین المذاہب آہنگی سردار محمد یوسف نے شہداء کی میتوں کو وصول کیا۔ ائیرپورٹ پر شہدا کے اہل خانہ و اہل علاقہ بھی موجود تھے۔
چاروں افراد جعفر ایکسپریس حملے میں شہید ہوئے تھے۔ شہید محمد ممتاز کا تعلق مانسہرہ سے ، نوزے علی کا تعلق سکردو گانچھے سے ہے۔ شہداء میں شامل ایک شہید ممتاز ریلوے کا ملازم تھا۔چاروں شہداء جعفر ایکسپریس حملے میں دہشت گردوں کی جانب سے بنائے گئے یرغمالیوں میں شامل تھے۔
وفاقی وزیر سردار محمد یوسف نے چاروں شہداء کے اہل خانہ سے ہمدردی کا اظہار کیا اور کہا کہ حکومت پاکستان وزیراعظم شہباز شریف اور پوری قوم شہداء کے غم میں برابر کی شریک ہے۔
شہداء اور ان کے اہلخانہ کی دفاع وطن اور امن و استحکام کے لیے قربانیوں کو قوم ہمیشہ یاد رکھے گی، یہ قربانیاں ضائع نہیں جائیں گی۔ چاروں شہداء کے جسد خاکی ان کے آبائی علاقوں کو روانہ کردئے گئے۔ شہداء کی نماز جنازہ کل ان کے اپنے اپنے آبائی علاقوں میں ادا کی جائے گی۔
Short Link: https://urdu.app.com.pk/urdu/?p=572232
