اسلام آباد۔12مئی (اے پی پی):وفاقی وزیر دفاع خواجہ محمد آصف نے کہا ہےکہ اگر بھارت سے مذاکرات ہوئے تو تین اہم بنیادی مسائل کشمیر ، دہشتگردی اور پانی بات ہوگی ۔پیر کے روز قومی اسمبلی کے باہر گفتگو کرتے ہوئے خواجہ محمد آصف نے کہا کہ کشمیر، دہشتگردی اور پانی تین بنیادی نکات ہیں، یہ تین ایسے معاملات ہیں جن کی گزشتہ 76 سال سے تاریخ ہے، ان تینوں معاملات پر بحث ہونی چاہیے، پاکستان دہشتگردی سے سب سے زیادہ متاثرہ ملک ہے ،یہ ایک سنہری موقع ہے کہ دونوں ملک مل کر دہشتگردی کا مسئلہ حل کریں،اسی طرح مسئلہ کشمیر کے حل کے حوالے سے بھی یہ بہترین موقع ہے۔
وفاقی وزیر دفاع نے کہا کہ امریکی صدر ڈونلڈ ٹرمپ کا مسئلہ کشمیر کے حل کی بات کرنا مثبت پیشرفت ہے، انہوں نے کہا کہ مسئلہ کشمیر حل ہونا چاہیے،ساری جنگیں مسئلہ کشمیر پر لڑی گئی ہیں، یہ جنگ بھی کشمیر کا مسئلہ تھا، مودی نے اس خطے کو آگ میں دھکیلنے کی کوشش کی تاہم افواج پاکستان نےآہنی دیوار بن کر دشمن کا مقابلہ کیا ،ہم چاہتے ہیں کہ بھارت کے ساتھ تمام مسائل حل ہوں۔
وزیر دفاع کا کہنا تھا کہ جو ملک دہشتگردی سے سب سے زیادہ شکار ہے اس پر الزام لگاکر حملہ کیا جائے یہ ستم ظریفی ہے، پانی کا مسئلہ 1960 کے معاہدے میں سیٹل ہے، اسے معطل کرنے کی کوئی گنجائش نہیں۔انہوں نے مزید کہا کہ افواج پاکستان نے جسطرح دشمن کو منہ توڑ جواب دیا وہ زخم سہلا رہے ہیں، ان کی پارلیمنٹ میں مودی کو برا بھلا کہا جارہا ہے ۔
انہوں نے کہا کہ یہ ہماری سفارتی جیت بھی ہے، اسرائیل کے سوا کوئی بھی ملک بھارت کے ساتھ نہیں کھڑا ،پاکستان نے تحمل اور فوجی طاقت کا لوہا منوایا ہے اور افواج پاکستان کو تاریخی کامیابی ملی۔
Short Link: https://urdu.app.com.pk/urdu/?p=596352
