اسلام آباد۔8جولائی (اے پی پی):پاکستان پیپلز پارٹی کے ترجمان اور وزیراعظم کے معاون خصوصی برائے تخفیف غربت و سماجی تحفظ فیصل کریم کنڈی نے کہا ہے کہ کہ بینظیرانکم سپورٹ پروگرام کے15سال مکمل ہوگئے ہیں، بی آ ئی ایس پی سے مستفیدہونے والے افرادکی تعداد90لاکھ تک پہنچ چکی ہے ۔ ہفتہ کو میڈیا کوآرڈینیٹر نذیر ڈھوکی کے ہمراہ پریس کانفرنس سے خطاب کرتے ہوئے فیصل کریم کنڈی نے کہا کہ بے نظیر انکم سپورٹ پروگرام کو15 سال پورے ہو گئے ہیں ،غریب خواتین کواپنے پائوں پر کھڑا کرنے کیلئے یہ پروگرام شروع کیا گیا تھا،اس پروگرام سے بینظیر کے نام کو ختم کرنے کی کوشش کی گئی جس میں وہ ناکام رہے ،90لاکھ غریب خواتین کو امدای رقم مل رہی ہے،
ملک بھر کے بنکوں میں ان خواتین کے اکائونٹس کھولے جائینگے،اب غریب خواتین کو بینظیر کارڈ فراہم کیا جائیگاجس میں صحت کی سہولیات بھی حاصل ہونگی،بینظیر تعلیمی وظائف، بینظیرنشوو نما پروگرام،حاملہ خواتین اور دو سال تک کے بچے،خواجہ سرا اور انڈر گریجوایٹس بھی اس پروگرام میں شامل ہونگے۔فیصل کریم کنڈی نے کہا کہ بے نظیر انکم سپورٹ پروگرام کو15 سال پورے ہو گئے ہیں ،2008 کے انتخابات سے پہلے بے نظیر بھٹو شہید نے غریب اور نادار خواتین کا سوچاکہ انہیں اپنے پائوں پر کھڑا کیا جائے،15 سال پورے ہو نے پر یہ کتاب شائع کی گئی ہے،عوام کا اس پروگرام پر اعتماد ہے، تمام عالمی مالیاتی ادارے بے نظیر انکم سپورٹ پروگرام کو سراہتے ہیں،اس پروگرام کا نام تبدیل کرنے اور اس کو ختم کرنے کی کوشش کی گئی مگر وہ عوام کے دلوں سے بے نظیر بھٹو شہید کا نام نکالنے میں ناکام رہے،
ہمارا یہ سفر آگے بھی جاری رہے گا،خواتین کو ہر سہ ماہی میں فنڈز بھی دیئے گئے اور اس پروگرام کے تحت دیگر فنڈز بھی دیئے جاتے ہیں،2019میں فیصلہ کیا گیا کہ الفلاح بنک اور حبیب بنک کے ذریعے غریب خواتین میں رقوم تقسیم کی جائیں،بینکوں سے رقوم سے کٹوتی کی جاتی رہی،وزیر اعظم نے سوشل پروفیشنل اکائونٹ کا افتتاح کردیا ہے،پہلے ڈاکخانے کے ذریعے رقم دی جاتی تھی اب رقم بینکوں کے ذریعے ٹرانسفر کی جائے گی، اب بے نظیر انکم سپورٹ پروگرام کے براہ راست اکائونٹس کھولے جائیں گے، 7 اضلاع میں بینک اکائونٹس کھلوانے کیلئے پائلٹ پراجیکٹ کا افتتاح ہوگیا ہے،اس وقت اکائونٹس الفلاح بینک، نیشنل بینک اور جے ایس بینک میں کھولے جاسکتے ہیں، جو بینک سٹیٹ بینک کے ساتھ رجسٹرڈہیں، ان میں اکائونٹس کھولے جائیں گے۔ انہوں نے کہا کہ 90 لاکھ خواتین بنیفشریز کوبینظیر خصوصی کارڈ دیا جائے گا،اس کارڈ کے ذریعے غریب خواتین کو صحت کی سہولیات بھی مہیا ہونگی،پہلے اس پروگرام میں 76لاکھ خواتین شامل تھیں ،اب ان کی تعداد90لاکھ تک پہنچ چکی ہے،پہلے ان کو 7ہزار روپے ملتے تھے،25فیصد اضافے کے بعد یہ رقم 8775روپے کردی گئی ہے
جو کہ ہر تین ماہ بعد ان خواتین کو ملے گی،معذور بچے کی فیملی کی مالی مدد بھی کی جائیگی۔بینظیر تعلیمی وظائف میں پہلے بچیوں کو دوہزار روپے اب 2500روپے جبکہ بچوں میں پہلے 1500روپے ، اسی طرح بینظیرنشوو نما پروگرام میں پہلے 15اضلاع میں 20ہزار بچے جبکہ اب 7لاکھ 70ہزار بچے رجسٹرڈہیں۔حاملہ خواتین اور دو سال کے بچوں میں ایک ارب روپے کی تقسیم کا سلسلہ شروع ہو چکا ہے،بے نظیر انکم سپورٹ پروگرام میں خواجہ سرا ئوں کو بھی شامل کیا گیا ہے سیلاب زدگان میں 25ارب روپے تقسیم کئے گئے،پٹرول کی مد میں 86لاکھ لوگوں میں 16.3ارب روپے تقسیم کئے گئے۔،انڈر گریجویٹ92 ہزار طلبا کو سکالرز شپ دینے کا پروگرام ہے ،بے نظیر انکم سپورٹ پروگرام کا سروے گھر گھر شروع ہے ،45موبائل وینز مل رہی ہیں
ان کو استعمال کریں گے ،نو لاکھ کارڈ سابقہ حکومت نے بندکر دیئے تھے انکوئری کے بعدان میں سے اڑھائی لاکھ کارڈ کھول دیئے گئے ہیں جبکہ باقی کے کھولنے پر کام کررہے ہیں۔انہوں نے کہا کہ بلوچستان میں پیپلز پارٹی اور اس کی اتحادی جماعتوں نے بلدیاتی انتخابات میں کامیابی حاصل کی ہے اور دوسرے نمبر پررہے ہیں ،انشااللہ جلد پہلے نمبر پر ہونگے،میں کامیاب ہونیوالے امیدواروں کو مبارکباد پیش کرتا ہوں۔ ایک سوال کے جواب میں انہوں نے کہا کہ کشمیر میں ایک نااہل شخص کو مسلط کیا گیا تھا جو کہ نااہل ہوگیا ،ضمنی انتخاب میں اس نشست پر پیپلز پارٹی کے امیدوار نے کامیابی حاصل کرلی،گلگت بلتستان میں بھی ایسا ہی ہوا ہے،
ہماری جماعت جی بی کے بارے میں فیصلہ کریگی۔ انہوں نے کہا کہ الیکشن کمیشن جب بھی بلدیاتی انتخابات کروائے ہم تیار ہیں جبکہ ہم نے تو عام انتخابات کیلئے سوات سے اپنی انتخابی مہم کا اغاز کردیا ہے۔ایک اور سوال کے جواب میں انہوں نے کہا کہ جمہوری نظام ہی سے سیاسی و معاشی استحکام آئیگا،ہم کسی بھی سیاسی جماعت کے خلاف نہیں ہیں ،استحکام پارٹی کے سیاسی میدان میں آنے کے بعد ہی اس کے بارے میں پتہ چلے گا۔
Short Link: https://urdu.app.com.pk/urdu/?p=373088
