بینظیر انکم سپورٹ پروگرام کی پائیداری اور ضرورت مند خواتین کی فلاح و بہبود کیلئے ہر ممکن اقدامات اٹھائے جا رہے ہیں، ڈاکٹر امجد ثاقب

ملتان۔ 01 دسمبر (اے پی پی):چیئرپرسن بینظیر انکم سپورٹ پروگرام ڈاکٹر محمد امجد ثاقب نے کہا ہے کہ بی آئی ایس پی پاکستان کا سب سے بڑا سماجی تحفظ کا پروگرام ہے،ضرورت مند وں خصوصا خواتین کی فلاح و بہبود اور پروگرام کی پائیداری کے لیے ہر ممکن اقدامات اٹھائے جا رہے ہیں۔ان خیالات کا اظہار انہوں نے بی آئی ایس پی زونل آفس جنوبی پنجاب،ضلعی دفتر ملتان کے دورے کے دوران کیا۔ڈاکٹر امجد ثاقب نے ضرورت مند خواتین کے مسائل سنے اور متعلقہ حکام کو ان کے مسائل فوری حل کرنے کی ہدایت کی۔

انہوں نے عملے کو شفاف ادائیگیوں کو یقینی بنانے اور پی او ایس ایجنٹوں کے ساتھ بات چیت کرنے کی ہدایت کرتے ہوئے کہا کہ دستیاب وسائل کے ساتھ ضرورت مند افراد کو سہولیات فراہم کی جائیں۔ڈاکٹر محمد امجد ثاقب نے ضرورت مند خواتین کی فلاح و بہبود اور پروگرام کی پائیداری کے لیے اپنے عزم کا اظہار کیا، دفاتر میں صفائی کے معیار کو برقرار رکھنے، ضرورت مند خواتین کے ساتھ حسن سلوک اور ہمدردی کے ساتھ برتاؤ کرنے کی اہمیت پر زور دیا۔

بی آئی ایس پی کے ملازمین سے خطاب کرتے ہوئے ڈاکٹر امجد ثاقب نے کہا کہ حکومت پاکستان کی طرف سے بی آ ئی ایس پی کیلئے 471 ارب روپے کا بجٹ مختص کیا گیا ہے،93 لاکھ غریب خاندانوں کی مالی امداد کی جا رہی ہے۔ڈاکٹر امجد ثاقب نے بی آئی ایس پی کو عوامی خدمت کے لیے ایک پائیدار پروگرام بنانے کے عزم کا اظہار کرتے ہوئے کہا کہ غریب خاندانوں کی امداد بھیک نہیں بلکہ ان کا حق ہے۔انہوں نے کہا کہ ضرورت مند گھرانوں کو غربت سے نکالنے کیلئےان کے بچوں کو تکنیکی مہارتوں سے منسلک کیا جائے اور ان میں چھوٹے کاروبار کرنے کی اہمیت اجاگر کی جائے ۔

انہوں نے بینظیر انکم سپورٹ پروگرام کی شکل میں ایک مثالی ادارہ بنانے کو سماجی ذمہ داری سمجھتے ہوئے ضرورت مند گھرانوں کے معاشی حالات کو بہتر بنانے کے لیے وقف فنڈ کے قیام کی تجویز پیش کی جبکہ پروگرام میں بہتری لانے کے لیے ادارے کے ملازمین کی جانب سے پیش کی گئی تجاویز بھی سنیں۔

Short Link: https://urdu.app.com.pk/urdu/?p=415658