اسلام آباد۔9اگست (اے پی پی):وزیرِ اعظم محمد شہباز شریف نے کہا ہے کہ پاکستان اور ترکیہ کے درمیان تجارتی تعلقات کو فروغ دینے کے خواہاں ہیں، دوطرفہ تجارتی حجم 5 ارب ڈالر سالانہ تک لے جانے کیلئے ترجیحی بنیادوں پر اقدامات کر رہے ہیں۔
وزیراعظم آفس کے میڈیا ونگ سے جاری بیان کے مطابق ان خیالات کااظہار انہوں نے ترک وزیرِ تجارت و کسٹمز ڈاکٹر عمر بولات کی سربراہی میں ترک سرمایہ کاروں کے اعلی ٰسطح وفد سے گفتگوکرتےہوئے کیا جنہوں نے جمعہ کو یہاں ان سے ملاقات کی۔ ملاقات میں وفاقی وزرا خواجہ محمد آصف، محمد اورنگزیب، عبدالعلیم خان، سردار اویس لغاری، پاکستان کے ترکیہ میں سفیر ڈاکٹر یوسف جنید بھی شریک تھے۔ترک وفد میں ترکیہ کے نائب وزیرِ تجارت مصطفیٰ تزجو، TOBB کے صدر رفعت حصار جِکلیوعلو، DEIK کے صدر نَیل اولپک، ترکیہ کنٹریکٹر ایسوسی ایشن کے صدر ایردال ایرن، MUSIAD کے صدر محمود عصمالی، TUMSIAD کے صدر یشار دوعان، ASKON کے صدر اورحان آئیدن، ترکیہ ایکسپورٹر اسمبلی کے صدر اتیلہ یرلیکایا اور ALBAYRAK ہولڈنگ کے چیئرمین احمت البیراک کے ساتھ ساتھ پاکستان میں ترکیہ کے سفیر مہمت پاچاجی شامل تھے۔
وزیرِ اعظم نے ترک سرمایہ کاروں کے وفد کے دورہ پاکستان کا خیر مقدم کیا اور کہاکہ ترکیہ اور پاکستان کے عوام کے مابین مثالی برادرانہ تعلقات ہیں جو صدیوں پر محیط ہیں۔ ترکیہ اور پاکستان ایک قوم دو ریاستیں ہیں۔ وزیرِ اعظم نے کہاکہ حکومت پاکستان دونوں ممالک کے مابین تجارتی تعلقات کے فروغ کی خواہاں ہے۔ انہوں نے کہاکہ ترک صدر رجب طیب ایردوان سے پاکستان اور ترکیہ کے مابین تجارتی حجم کو موجودہ سطح سے بڑھا کر سالانہ 5 ارب ڈالر پر پہنچانے پر اتفاق ہوا۔ تجارتی حجم کو سالانہ 5 ارب ڈالر پر پہنچانے کیلئے ترجیحی بنیادوں پر اقدامات کر رہے ہیں۔وزیرِ اعظم نے متعلقہ حکام کو ترکیہ کے سرمایہ کاروں کو پاکستان میں سرمایہ کاری کیلئے ہر قسم کی سہولت فراہم کرنے کی ہدایت کی ۔
وزیرِ اعظم نے ترکیہ کے صدر کو جلد پاکستان کا دورہ کرنے کی دعوت کا اعادہ کرتے ہوئے کہاکہ پاکستانی عوام ترکیہ کے صدر رجب طیب ایردوان کے پاکستان کے دورے کے منتظر ہیں۔ترکیہ کے سرمایہ کار وفد کا دورہ، پاکستان میں ترکیہ کی سرمایہ کاری میں اضافے کیلئے خوش آئند ثابت ہوگا۔ ملاقات میں ترکیہ کے وزیر تجارت نے کہاکہ 54 ترک سرمایہ کار کمپنیوں کی پاکستان میں سرمایہ کاری کا موجودہ حجم 3.5 ارب ڈالر ہے۔ترکیہ کے سرمایہ کاروں کا پاکستان میں سیاسی اور معاشی استحکام پر اطمینان کا اظہار کیا۔ ترک وفد نے 2023 کے زلزلے میں پاکستان کی جانب سے متاثرہ ترک بہن بھائیوں کی بھرپور امداد پر وزیرِ اعظم کا شکریہ اداکیا۔
Short Link: https://urdu.app.com.pk/urdu/?p=492074
