تنقید کرنے والوں کیلئے کچھ نہیں کہہ سکتا،جو چیز ہمارے کنٹرول میں نہیں اسے سوچتے بھی نہیں،بابر اعظم

کراچی۔22ستمبر (اے پی پی):پاکستان ٹیم کے کپتان بابر اعظم نے کہا ہے کہ تنقید کرنے والوں کیلئے کچھ نہیں کہہ سکتا،جو چیز ہمارے کنٹرول میں نہیں اسے سوچتے بھی نہیں۔ انہوں نے جمعرات نیشنل اسٹیڈیم کراچی میں پریس کانفرنس کرتے ہوئے کہا کہ آج کی پرفارمنس زبردست رہی، ہم نے پہلے بھی اہداف حاصل کیے ہیں، رضوان اور میں نے پلاننگ کے مطابق کھیلا۔

انہوں نے کہا کہ کنڈیشن اور ہدف کے لحاظ سے پلان بنایا تھا اور مثبت کھیلے، مقصد صرف ایک ہی تھا پاکستان یہ میچ جیتے۔ انہوں نے کہا کہ میرے اور رضوان کے مابین اچھے تعلقات ہیں، ٹیم میں ایک دوسرے کو سپورٹ کرنا ضروری ہے، نسیم کے بجائے حسنین کو بینچ اسٹرینتھ دیکھنے کیلئے موقع دیا تھا۔

انہوں نے کہا کہ بینچ اسٹرینتھ کو چیک کرنا ضروری ہے کیونکہ ورلڈ کپ قریب تر ہے، وکٹ دیکھنے میں ڈرائی لگ رہی تھی اور ہم نے کچھ کیچز ڈراپ کئے۔ بابر اعظم نے کہا کراچی کی کنڈیشن میں اسپن بائولنگ کو سپورٹ ملتا ہے۔