ملتان۔ 09 جنوری (اے پی پی):محکمہ زراعت ملتان کی ٹیم نے جعلی زرعی ادویات فیکٹری پرچھاپہ مار کر ایک کروڑ 8لاکھ روپے سے زائد مالیت کی جعلی زہریں برآمد کر کے ایک ملزم کو گرفتارکر لیا۔ترجمان محکمہ زراعت کے مطابق وزیر زراعت پنجاب سید عاشق حسین کرمانی کی ہدایت پرجعلی زرعی مداخل کی تیاری و خریدوفروخت میں ملوث عناصر کیخلاف روزانہ کی بنیاد پر صوبے بھر میں بلا تفریق کریک ڈاؤن جاری ہے۔اس سلسلہ میں ڈائریکٹرز پیسٹ وارننگ ڈاکٹر غلام عباس اور الیاس رضا کلاچی کی سربراہی میں محکمہ زراعت پیسٹ وارننگ ملتان کی ٹیم نے جمعرات کو یہاں انڈسٹریل سٹیٹ میں واقع جعلی زرعی ادویات بنانے والی فیکٹر ی پر چھاپہ مار کر ایک کروڑ آٹھ لاکھ 36ہزار روپے مالیت کی تین ہزار 540 لیٹر جعلی زرعی زہریں اور دیگر سامان برآمد کیا۔
محکمہ زراعت کی ٹیم نے پولیس کے ذریعے موقع سے ایک ملزم حماد احسن کو بھی گرفتار کروایا۔جعلی پیسٹی سائیڈ فیکٹری سے سینکڑوں کی تعداد میں مختلف کمپنیوں کے نام سے پرنٹ شدہ زرعی زہروں کے لیبل،خالی بوتلیں،سیلنگ مشین،پیکنگ میٹیریل،پیک شدہ بوتلیں،خالی ڈرم بھی برآمد ہوئے ہیں۔مذکورہ جعلی فیکٹری میں زرعی زہریں مکس کرکے مختلف کمپنیوں کے لیبل لگاکرمارکیٹ میں فروخت کئے جاتے تھے،برآمد شدہ تمام تر جعلی زرعی زہروں ودیگر سامان کو قبضہ میں لے کر حوالہ پولیس کردیا گیا ہے۔ترجمان محکمہ زراعت نے کہا ہے کہ غلط لیبل کا استعمال ایگریکلچر پیسٹی سائیڈز آرڈیننس کے رول15 جبکہ غیر قانونی و غیر رجسٹرڈ فیکٹری رول نو کی خلاف ورزی ہے برآمد شدہ پیک زرعی زہریں غیر رجسٹرڈ ہونے کے ناطے سیکشن چار کی خلاف ورزی ہے
گرفتار ملزم تنویر اکبرمالک جعلی پیسٹی سائیڈ فیکٹری حماد احسن ودیگر کیخلاف مقدمہ کے اندارج کیلئے تھانہ مظفر آباد میں استغاثہ دائر کردیا ہے۔انہوں نے مزید کہا ہے کہ جعلی زرعی ادویات فیکٹری سے برآمد ہونے والی زرعی زہروں کے15 نمونہ جات حاصل کرکے تجزیہ کیلئے لیبارٹری بھجوا دئیے گئے ہیں۔سیکرٹری زراعت پنجاب افتخار علی سہو کی ہدایت پر محکمہ زراعت زرعی مداخل میں ملاوٹ کے خلاف زیرو ٹالرنس پالیسی کے اصول پر عمل پیرا ہے۔
Short Link: https://urdu.app.com.pk/urdu/?p=544242
