اسلام آباد۔18اپریل (اے پی پی):محکمہ موسمیات نے متنبہ کیا ہے کہ جمعہ کی رات سے 20 اپریل کی صبح تک آندھی،جھکڑ،ژالہ باری ،گرج چمک اور تیز،موسلادھار بار ش کے باعث کمزور انفرا سٹرکچر (بجلی کے کھمبے، درخت، گاڑیوں، سولر پینل وغیرہ) کو نقصان کا خطرہ ہے۔
آئندہ چوبیس گھنٹوں کے دوران خیبر پختونخوا، بالائی/وسطی پنجاب، کشمیر اور گلگت بلتستان میں آندھی /جھکڑ چلنے اور گرج چمک کے ساتھ بارش جبکہ بعض مقامات پر تیز/موسلادھار بارش اور ژالہ باری کا امکان ہے۔ محکمہ موسمیات کے مطابق گذشتہ 24 گھنٹوں کے دوران ملک کے بیشتر علاقوں میں موسم گرم اور خشک جبکہ جنوبی علاقوں میں شدید گرم رہا۔
اس دوران بالائی خیبر پختونخوا، بالائی پنجاب اور گلگت بلتستان میں بعض مقامات پر آندھی اور گرج چمک کے ساتھ بارش ہوئی۔سب سے زیادہ بارش دیر (بالائی) میں 8، کالام، چترال 6، میر کھانی، پٹن، دروش 4، گوپس 7، بگروٹ 6، بونجی 4، استور 4، گلگت 3، چلاس 2، سکردو ایک اور حافظ آباد میں 5 ملی میٹر ریکارڈ کی گئی۔
جمعہ کے روز ریکارڈ کئے گئے زیادہ سے زیادہ درجہ حرارت کے اعدادوشمار کے مطابق دادو، سبی، شہید بینظیر آباد میں درجہ حرارت 47، خان پور، پڈ عیدن، بہاولنگر اور رحیم یار خان میں 46 ڈگری سینٹی گریڈ ریکارڈ کیا گیا ہے۔
Short Link: https://urdu.app.com.pk/urdu/?p=584299
